នគរបាលសន្តិសុខជាតិហុងកុង នៅថ្ងៃព្រហស្បតិ៍ (ទី២០ ខែកក្កដា)នេះ បានឃាត់ខ្លួនមនុស្ស ៤នាក់ ក្នុងនោះមានរួមទាំងបងប្រុសរបស់សកម្មជនដ៏លេចធ្លោឈ្មោះលោក Dennis Kwok ដែលជាមនុស្សម្នាក់ ក្នុងចំណោមជនរត់គេចខ្លួន ៨នាក់។ បន្ទាប់ពីជនទាំងនោះ ត្រូវបានចោទពីបទរំលោភសន្តិសុខជាតិ អាជ្ញាធរ សម្រេចផ្ដល់ប្រាក់រង្វាន់ដល់អ្នកដែលរាយការណ៍ពីពួកគេ។

ប្រភពពីនគរបាល បានប្រាប់សារព័ត៌មាន AFP ថា នាយកដ្ឋានសន្តិសុខជាតិរបស់ទីក្រុង «បានចាប់ខ្លួនបុរស ២នាក់ និងស្ត្រី ២នាក់ មកពីសង្កាត់ផ្សេងៗ ក្នុងទីក្រុងហុងកុង និងតំបន់ Kowloon (ខាវ លូន) ដើម្បីធ្វើការស៊ើបអង្កេត»។ ក្នុងចំណោមអ្នកទាំង ៤នោះ មានបងប្រុសរបស់អតីតសមាជិកសភាប្រជាធិបតេយ្យលោក Dennis Kwok ដែលបច្ចុប្បន្នរស់នៅសហរដ្ឋអាមេរិក។

អាជ្ញាធរបានប្រាប់សារព័ត៌មាន AFP នៅព្រឹកថ្ងៃព្រហស្បតិ៍នេះថា មនុស្ស ៣នាក់ផ្សេងទៀត «ស្ត្រី ២នាក់ និងបុរសម្នាក់» ត្រូវបានចាប់ខ្លួន កាលពីថ្ងៃអង្គារ (ទី១៨ ខែកក្កដា) ដោយនាយកដ្ឋានសន្តិសុខជាតិ។ សារព័ត៌មាន AFP បានព្យាយាមស្នើសុំការអត្ថាធិប្បាយពីនគរបាលលើការឃុំខ្លួនថ្មីៗនេះ។

ប្រភពបានបញ្ជាក់ថា អ្នកទាំង៣ ដែលត្រូវបានឃុំខ្លួន កាលពីថ្ងៃអង្គារនោះ គឺជាបងប្រុស ប្អូនស្រីថ្លៃ និងក្មួយប្រុសរបស់អ្នកសហជីពដ៏ល្បីឈ្មោះ លោក Mung Siu-tat ដែលក៏ស្ថិតក្នុងចំណោមអ្នកទាំង ៨នាក់នោះផងដែរ។

នគរបាលបានប្រាប់មកសារព័ត៌មាន AFP តាមរយៈសេចក្តីថ្លែងការណ៍ថា ពួកគេត្រូវបានសង្ស័យជួយបុគ្គល ដែលនគរបាលតាមរក (សម្រាប់ការបន្ត) ប្រព្រឹត្តទង្វើ និងចូលរួមក្នុងសកម្មភាពដែលបង្កគ្រោះថ្នាក់ដល់សន្តិសុខជាតិ៕