អ៊ីស្រាអែល៖ ការវាយប្រហារតាមអាកាសយ៉ាងខ្លាំងក្លា និងការបាញ់គ្រាប់រ៉ូកែតនៅក្នុងជម្លោះរវាងអ៊ីស្រាអែល និងតំបន់ហ្គាហ្សា បានសម្លាប់មនុស្សកាន់តែច្រើនថែមទៀតពីភាគីទាំងសងខាងកាលពីថ្ងៃអង្គារ ខណៈដែលភាពតានតឹងបានផ្ទុះឡើងនៅប៉ាឡេស្ទីន ដែលជាថ្ងៃចងកំហឹងនៅក្នុងទីក្រុង Jerusalem និងតំបន់ West Bank។
ការអំពាវនាវឱ្យមានបទឈប់បាញ់កាន់តែខ្លាំងឡើង ប៉ុន្តែនាយករដ្ឋមន្ត្រី Benjamin Netanyahu បានប្តេជ្ញាថា អ៊ីស្រាអែលនឹងបន្តវាយលុកលើតំបន់ព័ទ្ធជុំវិញឆ្នេរសមុទ្ររបស់ខ្លួន "ដរាបណានៅមានភាពចាំបាច់" មុនពេលកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិបានបរាជ័យ បន្ទាប់ពីរយៈពេលតិចជាងមួយម៉ោង ដោយមិនបានចេញសេចក្ដីថ្លែងការណ៍រួម។ នៅពេលជាមួយគ្នានោះ កម្លាំងអ៊ីស្រាអែល និងក្រុមអ្នកតវ៉ាបានប៉ះទង្គិចគ្នា នៅចំណុចតានតឹងជាច្រើននៅទូទាំងតំបន់ West Bank និងនៅទីក្រុង Jerusalem ខាងកើត ដោយ មនុស្សជាច្រើនបញ្ជូនទៅកាន់មន្ទីរពេទ្យ ខណៈប្រជាជនប៉ាឡេស្ទីនបានប្រមូលផ្ដុំគ្នា បង្ហាញសាមគ្គីភាពជាមួយសមភាគីហ្គាហ្សាដែលរងការឡោមព័ទ្ធ។ គ្រូពេទ្យបាននិយាយថា មនុស្សរាប់សិបនាក់ត្រូវបានព្យាបាលរបួស ដោយសារគ្រាប់កាំភ្លើងពិត។
យោងតាមក្រសួងសុខាភិបាលតំបន់ហ្គាហ្សាបានឱ្យដឹងថា យុទ្ធនាការទម្លាក់គ្រាប់បែកឥតឈប់ឈររបស់អ៊ីស្រាអែល បានសម្លាប់ប្រជាជនប៉ាឡេស្ទីនចំនួន ២១៧នាក់ក្នុងនោះមានកុមារចំនួន ៦៣នាក់ និងបានធ្វើឲ្យមនុស្សជាង ១.៤០០នាក់រងរបួសក្នុងរយៈពេលត្រឹមតែមួយសប្ដាហ៍ប៉ុណ្ណោះ នៅក្នុងតំបន់គ្រប់គ្រងដោយក្រុមសកម្មប្រយុទ្ធហាម៉ាស់។ នគរបាលបាននិយាយថា ចំនួនអ្នកស្លាប់នៅខាងអ៊ីស្រាអែលបានកើនឡើងដល់ ១២នាក់ ខណៈពេលដែលក្រុមហាម៉ាស់បានបាញ់គ្រាប់រ៉ូកែតទៅភាគខាងត្បូងតំបន់ Eshkol បានសម្លាប់ជនជាតិថៃ ២នាក់ដែលធ្វើការនៅក្នុងរោងចក្រមួយ និងបណ្ដាលឲ្យមនុស្សជាច្រើននាក់ទៀតរងរបួស៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
