អាជ្ញាធរគ្រប់គ្រងគ្រោះមហន្តរាយជាតិ (NDMA) របស់ប្រទេសប៉ាគីស្ថាន បានឲ្យដឹងថា មនុស្សជាង១០១នាក់ បានស្លាប់ និងជិត ២០០នាក់ផ្សេងទៀត បានរងរបួស អំឡុងរដូវភ្លៀងមូសុង ដែលចាប់ផ្តើមតាំងពីថ្ងៃទី២៥ ខែមិថុនា និងបន្តរហូតមកដល់បច្ចុប្បន្ន នៅទូទាំងប្រទេសប៉ាគីស្ថាន។

កាលពីថ្ងៃព្រហស្បតិ៍ (ទី២០ ខែកក្កដា) NDMA បាននិយាយថា ភាគខាងកើតខេត្ត Punjab របស់ប្រទេសនេះ បានរងគ្រោះយ៉ាងធ្ងន់ធ្ងរបំផុត នៅពេលមានភ្លៀងធ្លាក់ ដែលបណ្ដាលឲ្យមានអ្នកស្លាប់ចំនួន ៥៧នាក់ និងរបួស ១១៨នាក់ ដោយបន្ថែមទៀតថាលំនៅឋានចំនួន ៥៣ខ្នង ត្រូវបានបំផ្លាញផងដែរ នៅពេលមានភ្លៀងធ្លាក់យ៉ាងជោគជាំដែល នៅក្នុងខេត្តនេះ ក្នុងនោះរួមទាំងទីរួមខេត្ត Lahore ផងដែរ។

ដោយសារតែភ្លៀងធ្លាក់ខ្លាំង នៅក្នុងទីក្រុង Rawalpindi យ៉ាងហោចណាស់មនុស្ស ១២នាក់ បានបាត់បង់ជីវិត កាលពីថ្ងៃពុធ(ទី១៩ ខែកក្កដា) បន្ទាប់ពីជញ្ជាំងស្ពានដែលកំពុងសាងសង់ បានបាក់សង្កត់លើកម្មករ ដែលរស់នៅក្នុងតង់បណ្ដោះអាសន្ន។

NDMA បានឲ្យដឹងថា មនុស្សសរុបចំនួន ២៥នាក់ បានស្លាប់ និង ៤១នាក់ផ្សេងទៀតបានរងរបួសនៅក្នុងហេតុការណ៍ភ្លៀង ដាច់ដោយឡែកពីគ្នានៅក្នុងខេត្ត Khyber Pakhtunkhwa ភាគពាយ័ព្យរបស់ប្រទេស។ នៅខេត្ត Sindh ភាគខាងត្បូងរបស់ប្រទេស មនុស្ស ១០នាក់ បានស្លាប់ ហើយរងរបួស ២នាក់ នៅពេលដែលរន្ទះបានបាញ់ផ្ទះមួយខ្នង អំឡុងពេលមានព្យុះផ្គររន្ទះកាលពីដើមខែមិថុនា។

ជាមួយគ្នានេះ តួលេខរបស់ NDMA បានបង្ហាញទៀតថា មនុស្ស ៦នាក់បានស្លាប់ និង ១៣នាក់ផ្សេងទៀតបានរងរបួស នៅក្នុងខេត្ត Balochistan ភាគនិរតី ហើយមនុស្ស ៣នាក់ទៀត បានបាត់បង់ជីវិត នៅតំបន់ Kashmir ដែលគ្រប់គ្រងដោយប្រទេសប៉ាគីស្ថាន ដែលនៅទីនោះ មនុស្ស ៥នាក់ បានរងរបួសផងដែរ អំឡុងពេលភ្លៀងធ្លាក់ខ្លាំង៕