ប្រធានាធិបតីហ្វីលីពីន លោក ហ្វឺឌីណានដ៍ ម៉ាកូស ( Ferdinand Marcos Jr) បាននិយាយនៅថ្ងៃសុក្រនេះថា រដ្ឋាភិបាលរបស់លោក នឹងមិនសហការជាមួយការស៊ើបអង្កេតរបស់តុលាការព្រហ្មទណ្ឌអន្តរជាតិ (ICC) លើការសម្លាប់មនុស្សរាប់ពាន់នាក់ ដែលត្រូវបានប្រព្រឹត្តក្នុងអំឡុង«សង្គ្រាមគ្រឿងញៀន» របស់អ្នកកាន់តំណែងមុនរបស់គាត់នោះទេ។

លោកម៉ាកូស បានបញ្ជាក់ថា ICC មិនមានយុត្តាធិការលើប្រទេសអាស៊ីអាគ្នេយ៍នេះ ដែលបានដកខ្លួនចេញពីICC ក្នុងខែមីនា ឆ្នាំ២០១៩ នោះទេ។

លោកម៉ាកូស បានថ្លែងប្រាប់អ្នកយកព័ត៌មានថា៖«យើងនឹងមិនសហការជាមួយពួកគេ ក្នុងមធ្យោបាយ រូបភាព ឬទម្រង់ណាមួយឡើយ ត្រឹមតែរយៈពេលប៉ុន្មានថ្ងៃ បន្ទាប់ពីចៅក្រមឧទ្ធរណ៍នៅ ICC បានច្រានចោលការប៉ុនប៉ងរបស់ហ្វីលីពីនក្នុងការរារាំងការស៊ើបអង្កេតដោយព្រះរាជអាជ្ញារបស់តុលាការ ក្នុងយុទ្ធនាការប្រឆាំងគ្រឿងញៀនរបស់អតីតប្រធានាធិបតី លោក រ៉ូឌ្រីហ្គោ ឌូទែរើតេ (Rodrigo Duterte)។ 

ក្រុមសិទ្ធិមនុស្ស បាននិយាយថា មនុស្សរាប់ពាន់នាក់ ត្រូវបានសម្លាប់ក្នុងអំឡុងពេលប្រតិបត្តិការប្រឆាំងគ្រឿងញៀនដែលបានបញ្ចប់ដោយការបាញ់ប្រហារក្នុងអំឡុងអាណត្តិ៦ឆ្នាំរបស់លោកឌូទែរើតេ។ នគរបាលបានទទួលស្គាល់ជាផ្លូវការថា មានអ្នកស្លាប់ប្រហែល ៦.២០០នាក់ ហើយបដិសេធការចោទប្រកាន់អំពីការប្រហារជីវិតនិងការបិទបាំងជាប្រព័ន្ធ។

លោកម៉ាកូស បាននិយាយថា ឧក្រិដ្ឋកម្មដែលត្រូវបានចោទប្រកាន់ ត្រូវតែដោះស្រាយនៅក្នុងប្រទេសនេះ ដោយសារពួកគេត្រូវបានប្រព្រឹត្តឡើងនៅក្នុងទឹកដីហ្វីលីពីន។ ក្រសួងយុត្តិធម៌ បានសន្យាថា ការស៊ើបអង្កេតរបស់ខ្លួនលើសង្គ្រាមគ្រឿងញៀន នឹងមានភាពយុត្តិធម៌។