រដ្ឋាភិបាលជប៉ុនបានកែសម្រួលចក្ខុវិស័យសេដ្ឋកិច្ចរបស់ខ្លួនសម្រាប់ឆ្នាំសារពើពន្ធ២០២៣ ស្របពេលមានការធ្លាក់ចុះនៃកំណើនការនាំចេញ ដោយព្យាករណ៍ថា ផលិតផលក្នុងស្រុកសរុបឬ GDP ពិតប្រាកដរបស់ប្រទេសនេះនឹងកើនឡើងត្រឹមតែ ១,៣ភាគរយជំនួសឱ្យកំណើន១,៥ភាគរយ ដែលខ្លួនបានព្យាករណ៍កាលពីខែមករា នេះបើយោងតាមរបាយការណ៍ពីការិយាល័យទទួលបន្ទុកទីស្ដីការគណៈរដ្ឋមន្រ្តីកាលពីថ្ងៃព្រហស្បតិ៍។

ប្រទេសនេះក៏បានបង្កើនចក្ខុវិស័យរបស់ខ្លួនលើអតិផរណាអ្នកប្រើប្រាស់សម្រាប់ឆ្នាំសារពើពន្ធ ២០២៣ ដល់ ២,៦ភាគរយពីការប៉ាន់ប្រមាណពីមុនដែលមានចំនួន ១,៧ភាគរយ។ ការប៉ាន់ប្រមាណនោះ ធ្វើឡើង បន្ទាប់ពីអតិផរណា ដែលមាននិរន្តរភាពជិតពីរឆ្នាំរបស់ប្រទេសនេះ ដោយសន្ទស្សន៍តម្លៃអ្នកប្រើប្រាស់ស្នូលរបស់ប្រទេសជប៉ុន ដែលមិនរាប់បញ្ចូលតម្លៃអាហារស្រស់ បាននិងកំពុងកើនឡើងធៀបនឹងឆ្នាំមុនសម្រាប់រយៈពេល ២១ខែជាប់ៗគ្នាគិតត្រឹមខែឧសភាមក។

ចក្ខុវិស័យសេដ្ឋកិច្ចដែលបានធ្វើបច្ចុប្បន្នភាពសម្រាប់សារពើពន្ធ គឺមានរយៈពេលចាប់ពីខែមេសានៃឆ្នាំនេះដល់ខែមីនានៅឆ្នាំក្រោយ។ នៅថ្ងៃដដែលនោះ ក្រសួងហិរញ្ញវត្ថុរបស់ប្រទេសជប៉ុនបានរាយការណ៍ថា ប្រទេសនេះបានកត់ត្រាឱនភាពពាណិជ្ជកម្មជាង ៦,៩ពាន់ពាន់លានយ៉េន (៤៩,៩ពាន់លានដុល្លារអាមេរិក) នៅក្នុងឆមាសទីមួយនៃឆ្នាំនេះផងដែរ។

ទិន្នន័យកាលពីថ្ងៃព្រហស្បតិ៍នោះក៏បានបង្ហាញផងដែរថា ប្រទេសជប៉ុនបានប្រកាសអតិរេកពាណិជ្ជកម្មចំនួន ៤៣ពាន់លានយ៉េន (៣០០លានដុល្លារអាមេរិក) កាលពីខែមិថុនា។ ក្នុងរយៈពេលប្រាំមួយខែដំបូងនេះ ការនាំចូលរបស់ប្រទេសជប៉ុនបានកើនឡើង ០,៧ភាគរយ ខណៈដែលការនាំចេញបានកើនឡើង ៣,១ភាគរយ៕