អុីរ៉ង់ ៖ រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian និងសមភាគីប៉ាគីស្ថានលោក Bilawal Bhutto Zardari កាលពីថ្ងៃសៅរ៍ បានថ្កោលទោសចំពោះការប្រមាថមើលងាយគម្ពីរកូរ៉ាន នាពេលថ្មីៗនេះ នៅក្នុងប្រទេសស៊ុយអែត និងដាណឺម៉ាក នៅក្នុងការសន្ទនាតាមទូរស័ព្ទ។

លោករដ្ឋមន្ត្រីទាំងពីរ បាននិយាយថា ទង្វើ «លះបង់» បែបនេះ ផ្ទុយនឹងសេចក្តីថ្លៃថ្នូរ និងសិទ្ធិរបស់មនុស្ស នេះបើយោង​តាមសេចក្តីថ្លែងការណ៍​ដែលចេញផ្សាយនៅលើវេបសាយរបស់ក្រសួងការបរទេសអ៊ីរ៉ង់។

លោកAmir-Abdollahian បាននិយាយថា៖«ការប្រមាថមើលងាយកាលពីពេលថ្មីៗនេះចំពោះ​គម្ពីរកូរ៉ាននៅក្នុង​ប្រទេសស៊ុយអែត និងដាណឺម៉ាក បានធ្វើឲ្យប៉ះពាល់ដល់អារម្មណ៍របស់ប្រជាជនមូស្លីម នៅទូទាំងពិភពលោក»។

អ្នកការទូតកំពូលអ៊ីរ៉ង់រូបនេះ បានបញ្ជាក់ថា គាត់បានស្នើឲ្យមានកិច្ចប្រជុំបន្ទាន់នៃអង្គការកិច្ច​សហប្រតិបត្តិការ​ឥស្លាម(OIC)ដើម្បីបញ្ជូន«សារដ៏រឹងមាំ»មួយពីប្រទេសឥស្លាម ក្នុងការឆ្លើយតបទៅនឹងទង្វើបែបនេះ។

សម្រាប់ផ្នែករបស់គាត់ លោក Zardari បានចង្អុលទៅការចូលរួមរបស់គាត់នៅក្នុងកិច្ចប្រជុំរបស់​ក្រុមប្រឹក្សា​សិទ្ធិមនុស្សអង្គការ​សហប្រជាជាតិកាលពីដើមខែកក្កដាក្នុងអំឡុងពេលដែលក្រុមប្រឹក្សា បានអនុម័ត​ដំណោះស្រាយមួយ ដែលបានថ្កោលទោសនិងបដិសេធ​យ៉ាងដាច់អហង្ការរាល់ការតស៊ូមតិនៃការស្អប់ខ្ពើម​សាសនារួមទាំងការប្រមាថមើលងាយគម្ពីរកូរ៉ានដ៏ពិសិដ្ឋនេះ។