ភ្នំពេញ ៖ បណ្ដាអង្គការ សមាគម សង្គមស៊ីវិលនានានៅក្នុងប្រទេសកម្ពុជា នៅថ្ងៃទី ២៤ ខែកក្កដា ឆ្នាំ២០២៣នេះ បាន​ចេញសេចក្ដីថ្លែង​ការណ៍គាំទ្រ​លទ្ធផល​បឋមនៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដែលរៀបចំដោយគណៈកម្មាធិការជាតិរៀបចំការបោះឆ្នោត កាលពីថ្ងៃទី ២៣ ខែកក្កដា ឆ្នាំ២០២៣នេះ ។

​បណ្តុំអង្គការសង្គមស៊ីវិល ដែលមានសមាជិកមកពីបណ្ដាអង្គការសមាគមសង្គមស៊ីវិលជាង ២០ បានសង្កេត​ឃើញថា ដំណើរការ ការរាប់សន្លឹកឆ្នោត ក៏ដូចជាការប្រកាសលទ្ធផលនៃការបោះឆ្នោត​ជ្រើសតាំង​តំណាងរាស្រ្ដ​នីតិកាលទី៧ ឆ្នាំ ២០២៣នេះ ពិតជាមានតម្លាភាព យុត្តិធម៌ ត្រឹមត្រូវ​ប្រជាធិបតេយ្យ​ពិតប្រាកដ ពុំមានការបង្ខិតបង្ខំ គាបសង្កត់ បំភិតបំភ័យឡើយ ខណៈប្រជាពលរដ្ឋខ្មែរដែលមានឈ្មោះក្នុងបញ្ជីឈ្មោះបានទៅបោះឆ្នោត ដោយទឹក​មុខ​ញញឹម​ពេញចិត្តនិងសប្បាយរីករាយទាំងអស់គ្នា។

បណ្ដុំសង្គមស៊ីវិល ក៏បានថ្កោលទោសចំពោះក្រុមនិន្នាការប្រឆាំង ពិសេសទណ្ឌិតប្រឆាំងនៅក្រៅស្រុក និងបក្សពួក​ដែលបាន​ញុះញង់​ឲ្យ​ប្រជាពលរដ្ឋ​ធ្វើសកម្មភាពខុសច្បាស់ តាមរយៈការគូសខ្វែងសន្លឹកឆ្នោត និងផ្សព្វផ្សាយព័ត៌មាន​មិនពិត ប៉ុន្ដែទង្វើ​របស់ពួក​គេមិនបានធ្វើឱ្យប៉ះពាល់​ដល់ការ​បោះឆ្នោតនៅក្នុងប្រទេសកម្ពុជាឡើយ។

ចំណែកសហភាពអង្គការសង្គមស៊ីវិលមើលឃើញថា ការបោះឆ្នោតជ្រើសរើសតំណាងរាស្ត្រ នីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ បានប្រព្រឹត្តទៅស្របតាមរដ្ឋធម្មនុញ្ញ និងច្បាប់នៃព្រះរាជាណាចក្រកម្ពុជា និងប្រកបដោយ​លក្ខណៈ​សេរីត្រឹមត្រូវ និងយុត្តិធម៌ ក្នុងបរិយាកាសអព្យាក្រឹត សន្តិសុខ របៀបរៀបរយ គ្មាន​អំពើហិង្សា និងការគំរាមកំហែង។

សហភាពអង្គការសង្គមស៊ីវិលលើកឡើងថា ទោះពីជាមានក្រុមជ្រុលនិយមមួយចំនួនព្យាយាមក្នុងការរារាំង ដើម្បីមិនឱ្យ​ប្រជាជនទៅធ្វើការបោះឆ្នោត ឬទៅគូសបំផ្លាញសន្លឹកឆ្នោតចោល ប៉ុន្តែជាលទ្ធផលដែល​ទទួលបានពី​របស់​គណៈកម្មាធិការ​ជាតិរៀបចំការបោះឆ្នោត (គ.ជ.ប.) ជាបណ្តោះអាសន្ន ប្រជាពលរដ្ឋបាន​ចេញទៅបោះឆ្នោត​ជាង ៨ លាន ២សែន នាក់ ស្មើនឹង ៨៤, ៥៨% នៃចំនួនប្រជាពលរដ្ឋក្នុងបញ្ជីឈ្មោះបោះឆ្នោតសរុប។

ចំណែកសមាគមបណ្តាញប្រជាជនកម្ពុជា តាមរយៈក្រុមសង្កេតការណ៍របស់ខ្លួនបាន សន្និដ្ឋាន និងវាយតម្លៃខ្ពស់​ចំពោះ​ដំណើរ​ការនៃការបោះឆ្នោតនេះ បានប្រព្រឹត្តទៅដោយរលូន ត្រឹមត្រូវ តម្លាភាព សេរី និងយុត្តិធម៌ ព្រមទាំង​មាន​សណ្ដាប់​ធ្នាប់​ល្អ។ សមាគមនប្រកាស​គាំទ្រលើកិច្ចដំណើរការនៃ​ការបោះឆ្នោតជ្រើស​តាំងតំណាង​រាស្ត្រ​នីតិកាលទី៧​​ឆ្នាំ២០២៣ដែលរៀបចំឡើងដោយគណៈកម្មាធិការជាតិរៀបចំការបោះឆ្នោត (គ.ជ.ប) ដែលជា​ស្ថាប័ន​ឯករាជ្យ៕​ អត្ថបទ៖ វ៉ន ដារ៉ា