ភ្នំពេញ៖ ក្នុងឱកាសដឹកនាំក្រុមទី១ វេនប្រចាំបញ្ជារបស់លេខាធិការដ្ឋាននៃគ.ស.អ សម្រាប់ការបោះឆ្នោត​ជ្រើសតាំង​តំណាងរាស្ត្រនីតិកាលទី៧ ឆ្នាំ២០២៣ ​នៅអគ្គស្នងការដ្ឋាននគរបាលជាតិ នាព្រឹកថ្ងៃទី២៥ ខែកក្កដា ឆ្នាំ២០២៣នេះ ឧត្តមសេនីយ៍ឯក ឆាយ គឹមខឿន អគ្គស្នងការរង​នគរបាលជាតិ ​បានអះអាងថា ​ដំណើរការបោះឆ្នោតជ្រើសតាំងតំណាង រាស្រ្តនីតិកាលទី៧ នាពេលកន្លង​មកនេះគឺមានសភាពការល្អ ​និងពុំមានបញ្ហាអសន្តិសុខណាមួយកើត ឡើងនោះទេ​បើទោះបីជាមានការញុះញង់​ពីជនអគតិមួយក្តាប់តូចពី​ខាង​ក្រៅក៏ដោយនោះ។

សូមបញ្ជាក់ថា ​កិច្ចប្រជុំរបស់អគ្គស្នងការដ្ឋាននគរបាលជាតិជាប្រចាំនេះ ​គឺធ្វើឡើង​តាមសេចក្តី​សម្រេច ស្តីពីការចាត់តាំងក្រុមប្រចាំបញ្ជារបស់លេខាធិការដ្ឋាន​នៃ គ.ស.អ សម្រាប់​ការបោះឆ្នោត​ជ្រើសតាំងតំណាងរាស្ត្រ​ នីតិកាលទី៧ ឆ្នាំ២០២៣ ​ដោយមានភារកិច្ចដូចជា​ជួយដល់​លេខា​ធិការដ្ឋាន ​នៃ​គ.ស.អ ក្នុងការតាមដានការអនុវត្តច្បាប់ ​និងលិខិតបទដ្ឋានគតិយុត្ត ពាក់ព័ន្ធដល់​ការបោះឆ្នោត ​ការអនុវត្តបទបញ្ជា ​និងនីតិវិធីរបស់ គ.ជ.ប ទាំងមុន​ ក្នុង​ និងក្រោយការបោះឆ្នោត។

ប្រមូលព័ត៌មាន ​និងរបាយការណ៍ពីបណ្តាក្រសួង-ស្ថាប័ន ​អង្គភាពពាក់ព័ន្ធ និងពីយន្តការរចនា​សម្ព័ន្ធ សន្តិសុខបោះឆ្នោតគ្រប់ថ្នាក់ ​ជុំវិញស្ថានការណ៍សន្តិសុខបោះឆ្នោត ​និងកិច្ចការពារសន្តិសុខ សណ្តាប់ធ្នាប់សាធារណៈ និងសុវត្ថិភាពទូទៅ ដើម្បីរាយការណ៍ជូនប្រធានលេខាធិការដ្ឋាននៃ គ.ស.អ សុំការចង្អុលដឹកនាំបន្ត។

តាមដាន ក្តាប់ព័ត៌មាន និងសភាពការណ៍នានា ដែលបានកើតឡើងនៅតាមបណ្តារាជធានី ខេត្តទាំង​មុនក្នុង​ និងក្រោយការបោះឆ្នោត ធ្វើការវិភាគ វាយតម្លៃ​ រាយការណ៍ដោះស្រាយ​បានទាន់​ពេលវេលា។ ​ធ្វើរបាយការណ៍រៀងរាល់ថ្ងៃ អំពីស្ថានការណ៍សន្តិសុខ​បោះឆ្នោត​ជ្រើសតាំង​តំណាងរាស្ត្រនីតិកាល​ទី៧ ឆ្នាំ២០២៣ ជូនប្រធានលេខាធិការដ្ឋាននៃគ.ស.អ ដើម្បីរាយការណ៍​ជូន​ប្រធានគណៈបញ្ជាការសន្តិសុខ​អចិន្ត្រៃយ៍​សម្រាប់ការបោះឆ្នោត​ និង​ក្រុមប្រចាំបញ្ជានេះ ត្រូវ​បំពេញភារកិច្ចប្រចាំការប្តូរវេនវិលជុំ ​ចាប់ពីថ្ងៃទី១ ខែកក្កដា​ ឆ្នាំ២០២៣ ​រហូតដល់ចប់បេសកកម្ម និង​ត្រូវបំពេញភារកិច្ចផ្សេងៗទៀត ​តាមការប្រគល់ជូនរបស់ប្រធានលេខាធិការដ្ឋាន នៃគ.ស.អជាដើម៕អត្ថបទ៖ បាន ចក់