ភ្នំពេញ ៖ បណ្ដាអង្គការ សមាគម សង្គមស៊ីវិលនានានៅក្នុងប្រទេសកម្ពុជា នាថ្ងៃទី ២៥ ខែកក្កដា ឆ្នាំ២០២៣នេះ​បានចេញសេចក្ដីថ្លែងការណ៍ជាបន្តបន្ទាប់គាំទ្រដល់ដំណើរការ និងលទ្ធផលបឋមនៃការបោះឆ្នោតជ្រើស​តាំង​តំណាងរាស្ត្រ នីតិកាលទី៧ ដែលប្រព្រឹត្តកាលពីថ្ងៃទី ២៣ ខែកក្កដា ឆ្នាំ២០២៣នេះ ប្រកប​ដោយភាពត្រឹមត្រូវ យុត្តិធម៌ និងលទ្ធិប្រជាធិបតេយ្យពេញលេញ។

បណ្ដាអង្គការ សមាគម សង្គមស៊ីវិលនានានៅរាជធានី-ខេត្តប្រកាសគាំទ្រយ៉ាងពេញទំហឹងចំពោះលទ្ធផល​នៃការបោះឆ្នោតសម្រាប់ នីតិកាលទី៧ ឆ្នាំ២០២៣ នេះ ដែលគណៈកម្មាធិការជាតិរៀបចំការបោះឆ្នោត (គជប) បានចេញសេចក្ដីប្រកាសលទ្ធផលបណ្ដោះអាសន្នកាលពីប្រលប់ថ្ងៃទី ២៣ ខែកក្កដា ឆ្នាំ២០២៣កន្លងទៅ​នេះ ហើយដែលបង្ហាញថា គណបក្សប្រជាជនកម្ពុជា ទទួលបានសម្លេងឆ្នោតគាំទ្រយ៉ាងច្រើនលើសលុប។

បណ្ដាអង្គការ សមាគម សង្គមស៊ីវិលនានាសង្កេតឃើញថា ដំណើរការ ក៏ដូចជាការប្រកាសលទ្ធផលពិតជាមាន​តម្លាភាព សេរី យុត្តិ-ធម៌ ត្រឹមត្រូវ ប្រជាធិបតេយ្យពិតប្រាកដ​ ពុំមានការបង្ខិតបង្ខំ គាបសង្កត់ បំភិតបំភ័យគឺបង​ប្អូន​ប្រជាពលរដ្ឋខ្មែរ គ្រប់ៗរូប បានទៅបោះឆ្នោត ដោយទឹកមុខញញឹម ​ពេញចិត្តនិង​សប្បាយរីករាយ​ទាំងអស់គ្នា។

បណ្ដាអង្គការ សមាគម សង្គមស៊ីវិលនានា ក៏បានថ្កោលទោសដល់ក្រុមនិន្នាការប្រឆាំងពិសេស​អតីតមេបក្ស​ប្រឆាំង​ទណ្ឌិត សម រង្ស៊ី និងបក្សពួកដែលបានរត់ភៀសខ្លួននៅក្រៅប្រទេស​ ដែលបន្តញុះញង់​ឲ្យប្រជាពលរដ្ឋ​ធ្វើ​សកម្មភាព​ខុសច្បាស់ ពិសេសការគូសខ្វែងសន្លឹកឆ្នោត ប៉ុន្ដែផ្ទុយ​ទៅវិញអ្វីដែល​ក្រុមប្រឆាំង​បានកំពុងតែ​ធ្វើនោះមិនត្រឹម​តែមិន​បានផលថែមទាំងធ្វើឲ្យសន្លឹកឆ្នោតមិនមានការថយចុះទៅវិញ។

បើតាម គ.ជ.ប បើប្រៀបធៀបនឹងការបោះឆ្នោតនីតិកាលទី៧ ឆ្នាំ២០២៣ មានសន្លឹកឆ្នោតមិនបានការចំនួនជាង ៤៤ ម៉ឺនសន្លឹកប៉ុណ្ណោះ ដែលចំនួននេះតិចជាងចំនួនសន្លឹកឆ្នោតមិនបានការកាលពីការបោះឆ្នោត​ជ្រើសតាំងតំណាងរាស្ត្រ​នីតិកាលទី៦ ឆ្នាំ២០១៨ ដែលមានជាង ៥៩ ម៉ឺនសន្លឹក។

បណ្ដាអង្គការ សមាគម សង្គមស៊ីវិលនានា ប្រកាសគាំទ្រចំពោះលទ្ធផលដែល គ.ជ.ប ប្រកាសលទ្ធផល​ណ្តោះអាសន្ន និងសូមចូលរួមអបអរសាទរដល់គណបក្ស​ប្រជាជនកម្ពុជាដែលទទួលបាន​សម្លេងគាំទ្រយ៉ាង​ច្រើនលើសលប់​ពី​សំណាក់​បងប្អូនប្រជាពលរដ្ឋខ្មែរនៅទូទាំងប្រទេសក្នុងការបោះឆ្នោតថ្នាក់ជាតិអាណត្តិនេះ៕ អត្ថបទ៖វ៉ន ដារ៉ា