សាកសពជនអន្តោប្រវេសន៍៥នាក់ ត្រូវបានរកឃើញនៅក្នុងតំបន់ដែលមានការបំផ្លាញមួយកន្លែងនៅជិតព្រំដែនរវាងប្រទេសលីប៊ី និងទុយនីស៊ី។ អាជ្ញាធរប្រទេសលីប៊ី និយាយកាលពីថ្ងៃចន្ទថាបានប្រទះឃើញដ៏គួឲ្យភ្ញាក់ផ្អើលក្នុងអំឡុងការល្បាតនៅព្រំដែន។ ជនអន្តោប្រវេសន៍នៅអនុតំបន់សាហារ៉ា រាប់សិបនាក់ បានជាប់គាំដំណើរនៅក្នុងតំបន់នេះរយៈពេលច្រើនសប្តាហ៍ បន្ទាប់ពីអាជ្ញាធរទុយនីស៊ី បានប្រមូល និងផ្លាស់ប្តូរពួកគេទៅទីនោះពីកំពង់ផែទីក្រុង Sfax។

ជនអន្តោប្រវេសន៍ និយាយថា ស្ថានភាពធ្ងន់ធ្ងរនៅព្រំដែនដោយគ្មានការទទួលបានម្ហូបអាហារ ទឹកផឹក ឬទីជ្រកកោនពីកម្តៅថ្ងៃឡើយ។ ដោយគ្មានអាហារ គ្មានទឹក ពួកគេយកយើងមកដល់ទីនេះនេះ ពួកគេប្រើវិធីឃោរឃៅមកលើពួកយើង គ្មានកន្លែងដេក គ្មានអ្វីទទួលទាន។ យើងកំពុងសុំឲ្យអង្គការសហប្រជាជាតិ ផ្តល់ជំនួយឲ្យយើង ពួកយើងកំពុងទទួលរងអំពើឃោរឃៅ។ សូមមើលស្បែករបស់យើង យើងឆ្លងមេរោគ គ្មានការព្យាបាល ពួកគេកំពុងប្រព្រឹត្តមកលើយើងយ៉ាងព្រៃផ្សៃ។

ជនអន្តោប្រវេសន៍មកពីអាហ្វ្រិកគ្មានឯកសាររាប់ពាន់នាក់ បានសម្រុកមកកាន់ទីក្រុងកំពង់ផែ Sfax ជារដ្ឋធានីសេដ្ឋកិច្ចរបស់ប្រទេសទុយនីស៊ី ដោយមានគោលដៅទៅកាន់អឺរ៉ុប តាមទូក។ ការសម្រេចចិត្តរបស់ប្រទេសទុយនីស៊ី ក្នុងការផ្លាស់ប្តូរទីតាំងរបស់ពួកគេទៅកាន់ព្រំដែន បន្ទាប់ពីអំពើហិង្សាជាច្រើនថ្ងៃរវាងពលរដ្ឋ និងជនអន្តោប្រវេសន៍ អំឡុងពេលដែលបុរសជនជាតិទុយនីស៊ីម្នាក់ ត្រូវបានគេសម្លាប់។ បន្ទាប់មក រដ្ឋាភិបាលទុយនីស៊ី បានផ្លាស់ប្តូរពួកគេទៅកាន់ទីជម្រកក្នុងក្រុងចំនួន២ ប៉ុន្តែក្រុមសិទ្ធិមនុស្សនិយាយថា មនុស្សរាប់សិបនាក់ទៀត នៅតែជាប់គាំងនៅព្រំដែន។ អឺរ៉ុប កំពុងដាក់សម្ពាធលើប្រទេសទុយនីស៊ី ឲ្យបញ្ឈប់ចំនួនមនុស្សដ៏ច្រើនមិនឲ្យចេញដំណើរពីឆ្នេរសមុទ្ររបស់ខ្លួន។ ប្រទេសនេះ បានចុះហត្ថលេខាលើកិច្ចព្រមព្រៀងមួយកាលពីសប្តាហ៍មុនជាមួយសហភាពអឺរ៉ុប ដោយសន្យាបង្ក្រាបលើក្រុមជួញដូរមនុស្ស ជាថ្នូរនឹងជំនួយជាង១ពាន់លានដុល្លារ។