មូលហេតុនៃការដួលរលំដំបូលនៅគ្រឹះស្ថានហាត់ប្រាណរបស់សាលារៀនមួយកន្លែងក្នុងទីក្រុងឈីឈីហា (Qiqihar) នៃខេត្តហៃឡុងជាំង (Heilongjiang) ភាគឦសានប្រទេសចិន ត្រូវបានគេកំណត់ការសន្និដ្ឋានជាបឋម ហើយការស៊ើបអង្កេតមួយត្រូវបានធ្វើឡើង។

ឧបទ្ទវហេតុនេះបានរាយការណ៍នៅម៉ោងប្រហែល ១៤:០០ នាទីថ្ងៃអាទិត្យ បានបណ្តាលឲ្យមនុស្ស ១១ នាក់ស្លាប់។

មានមនុស្ស ១៩នាក់ នៅឯគ្រឹះស្ថានហាត់ប្រាណដែលមានទំហំប្រហែល ១.២០០ម៉ែត្រក្រឡានៅសាលាមធ្យមលេខ៣៤ ក្នុងស្រុកឡុងសា (Longsha) នៅពេលដែលគ្រោះថ្នាក់បានកើតឡើង។

លោក Shen Hongyu អភិបាលក្រុងឈីឈីហា បាននិយាយថា បន្ទាប់ពីការស៊ើបអង្កេត គេបានរកឃើញថា អង្គភាពសំណង់បានដាក់សមាសធាតុកញ្ចក់ ដែលជាសម្ភារៈសំណង់អ៊ីសូឡង់កម្ដៅដោយខុសច្បាប់នៅលើដំបូលគ្រឹះស្ថានហាត់ប្រាណនោះ អំឡុងពេលសាងសង់អគារបង្រៀនដែលនៅជាប់នឹងកន្លែងហាត់ប្រាណ។

ដើម្បីដោះស្រាយហានិភ័យសន្តិសុខដែលបានបង្ហាញដោយគ្រោះថ្នាក់នេះ ក្រុមអាជ្ញាធរមូលដ្ឋាននឹងធ្វើការត្រួតពិនិត្យឱ្យបានហ្មត់ចត់លើបរិវេណសាលា ពហុកីឡដ្ឋាន ការដ្ឋានសំណង់ និងតំបន់ផ្សេងៗទៀត ដើម្បីធានាសុវត្ថិភាពអាយុជីវិត និងទ្រព្យសម្បត្តិរបស់ប្រជាពលរដ្ឋ៕