កំពង់ឆ្នាំង៖ ក្រុមជួយសង្គ្រោះពីខេត្តកំពង់ឆ្នាំង និងស្រុកកំពង់លែង កំពុង​រុក​រក​មនុស្ស ២​នាក់​ទៀត ដែលបានបាត់ខ្លួនក្នុងហេតុការណ៍លិចកាណូតកណ្តាលទន្លេ ស្ថិតក្នុងឃុំប្រឡាយមាស ស្រុក​កំពង់លែង ខេត្តកំពង់ឆ្នាំង។ មកដល់ម៉ោង៩និង៣០នាទីព្រឹកថ្ងៃទី២៦ ខែកក្កដា ឆ្នាំ​២០២៣​នេះ ក្រុមជួយសង្គ្រោះបានរកឃើញតែកាណូតជនរងគ្រោះ ហើយ​ជន​រង​គ្រោះ​២​នាក់​នោះ មិនទាន់រកឃើញនៅឡើយ។

 ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានជំរុញអោយក្រុមរុករក ត្រូវ​បង្កើន​ការ​ខិត​ខំ​រក​ជនរងគ្រោះប្តីប្រពន្ធ ឬសពជនរងគ្រោះទាំង២អោយឃើញក្នុងថ្ងៃនេះ ចំណែក​កូន​ជន​រង​គ្រោះ​ដែល​នៅរស់ ត្រូវបញ្ជូនគាត់ទៅមន្ទីរពេទ្យបង្អែក ដើម្បីសង្គ្រោះ។ ឯកឧត្តម​សំណូមពរ​ដល់​ប្រជាពលរដ្ឋ​ដែល​ធ្វើ​ដំណើរតាមផ្លូវទឹក ត្រូវប្រុងប្រយ័ត្នជាប់ជានិច្ច។

 គួររំលឹកថា កាលពីវេលាម៉ោង៤និង៣០នាទីរសៀលថ្ងៃទី២៥ ខែកក្កដា ឆ្នាំ២០២៣ មាន​ភ្លៀង​មួយ​មេ​យ៉ាង​ធំ​លាយ​លំនឹងខ្យល់កន្រ្តាក់ បានធ្វើអោយកាណូតបាឡាស្មាច់ ក្រឡាប់​លិច​នៅ​ចំណុច​ខាង​លិច​កោះ​ចាប ស្ថិតក្នុងឃុំប្រឡាយមាស ស្រុកកំពង់លែង ខេត្តកំពង់ឆ្នាំង ដែល​ក្នុង​កាណូត​បាឡាស្មាច់នោះមានមនុស្សចំនួន៣នាក់ ១. រ៉េន រឹទ្ធ ភេទប្រុស អាយុ៣៩ឆ្នាំ ត្រូវ​ជា​ប្ដី​បាន​បាត់​ខ្លួន, ២. អេង យីម ភេទស្រី អាយុ៤៤ឆ្នាំ ប្រពន្ធបានបាត់ខ្លួន និង៣. ប៉ុន ភារម្យ ភេទប្រុស អាយុ១៦ឆ្នាំ ត្រូវជាកូន បានហែលរួចខ្លួន៕ អត្ថបទ៖ ហុង វាស្នា