ភ្នំពេញ៖ សមាគមមីក្រូហិរញ្ញវត្ថុកម្ពុជា ជំរុញ និងលើកទឹកចិត្តដល់សមជិកដែលជាគ្រឹះស្ថាន​មីក្រូហិរញ្ញវត្ថុទាំងអស់ ផ្តល់ឥណទានដល់សហគ្រាសធុនតូចឲ្យបានកាន់តែច្រើន ក្នុងគោល​ដៅលើកកម្ពស់សកម្មភាពអាជីវកម្ម ដើម្បីចូលរួមចំណែកដល់ការអភិវឌ្ឍសេដ្ឋកិច្ចជាតិ។

លោក ផល វ៉ាន់ឌី អគ្គលេខាធិការសមាគមមីក្រូហិរញ្ញវត្ថុកម្ពុជា​ លើកឡើងនៅថ្ងៃទី២៥ ខែកក្កដា ឆ្នាំ២០២៣ នេះថា ​សហគ្រាសធុនតូច និងមធ្យម គឺជាឆ្នឹងខ្នងដ៏សំខាន់ក្នុងការចូលរួមអភិវឌ្ឍន៍​សេដ្ឋកិច្ចជាតិ, ដូច្នេះចំពោះគំនិត​ផ្តួចផ្តើម​ គម្រោងផ្តល់ឥណទានដល់​សហគ្រាសធុនតូច របស់​សមាគមមីក្រូហិរញ្ញវត្ថុកម្ពុជានេះ​ ដោយបច្ចុប្បន្នសមាគមមើលឃើញថា ​ប្រជាពលរដ្ឋកម្ពុជា ជាច្រើន ​មានស្មារតីជាសហគ្រិនភាពជច្រើន ​នៅក្នុងកិច្ចការប្រកបអាជីវកម្ម ដើម្បីបង្កើតប្រាក់​ចំណូលនៅក្នុងគ្រួសាររបស់ពួកគាត់។

ជុំវិញគម្រោងនេះ លោក ផល វ៉ាន់ឌី បានលើកឡើងឲ្យដឹងថា កន្លងមកនេះការផ្តល់ឥណទាន​ដល់​សហគ្រាសធុនតូច របស់គ្រឹះស្ថានមីក្រូហិរញ្ញវត្ថុ ​ក្នុងរង្វង់ប្រមាណ ៣០ ភាគរយ នៃការផ្តល់​ឥណទានសរុបប៉ុណ្ណោះ ។ ដើម្បីឲ្យសហគ្រាសធុនតូចក្នុងស្រុក ទទួលបានឥណទានកាន់តែកាន់​ច្រើន សមាគមមីក្រូហិរញ្ញវត្ថុកម្ពុជា ​សូមលើកទឹកចិត្តដល់គ្រឹះស្ថានដែលជាសមាជិកទាំងអស់ ​ជួយ បង្កើតនូវផលិតផល ​និងសេវាកម្មថ្មីៗ ដើម្បីលើកកម្ពស់ការផ្តល់ឥណទានដល់សហគ្រាសខ្នាតតូច ក្នុងគោលដៅជំរុញពង្រីកអាជីវកម្មនៅតាមសហគមន៍​ ឬនៅតាមមូលដ្ឋាន ​ឲ្យកាន់តែរីកចម្រើន​បន្ថែមទៀត​ ដើម្បីចូលរួមចំណែកការអភិវឌ្ឍសេដ្ឋកិច្ចជាតិជាមួយរាជរដ្ឋាភិបាលកម្ពុជា។

សមាគមមីក្រូហិរញ្ញវត្ថុកម្ពុជា​ នឹងបន្តធ្វើកិច្ចការជាច្រើនបន្ថែមទៀត ដើម្បីឲ្យអតិថិជនអាចទទួល​បាន​ហិរញ្ញវត្ថុផ្លូវការ ប៉ុន្តែអតិថិជនខ្លួនឯង ​ក៏ត្រូវលើកកម្ពស់នូវចំណេះដឹងហិរញ្ញវត្ថុ និងមានផែនការ​អាជីវកម្មច្បាស់លាស់​ និងការកសាងកេរឈ្មោះល្អដល់អ្នកផ្តល់សេវាហិរញ្ញវត្ថុ ដើម្បីទទួលបាន​ឥណទាន​យកទៅអភិវឌ្ឍន៍ក្នុងអាជីវកម្មនេះ៕អត្ថបទ៖ សុន រ៉ាឌី