ទួរគី៖ ប្រភពពីក្រសួងការបរទេសទួរគី បានឲ្យដឹងថា រដ្ឋមន្ត្រីការបរទេសចិន លោក Wang Yi បានពិភាក្សាអំពីបញ្ហាអ៊ុយក្រែនជាមួយសមភាគីទួរគី ក្នុងទីក្រុងអង់ការ៉ា ហើយបានជួបជាមួយប្រធានាធិបតីលោក Tayyip Erdogan កាលពីថ្ងៃពុធ (ថ្ងៃទី២៦ ខែកក្កដា) ដែលជំនួបនេះ បានកើតឡើង អំឡុងដំណើរទស្សនកិច្ចបរទេសលើកដំបូងរបស់លោក ចាប់តាំងពីទទួលបានការតែងតាំង។

ប្រទេសចិនបានតែងតាំងលោក Wang ដែលជាអ្នកការទូតជើងចាស់ ជារដ្ឋមន្ត្រីការបរទេសថ្មីរបស់ខ្លួនកាលពីថ្ងៃអង្គារ (ទី២៥ ខែកក្កដា) ដោយបានបញ្ចប់តំណែងរបស់លោក Qin Gang បន្ទាប់ពីអតីតឥស្សជន ដែលកំពុងលេចធ្លោរូបនេះ បានអវត្តមានរយៈពេលមួយខែពីតួនាទី ដែលលោកចូលមកបំពេញការងាររយៈជិតកន្លះឆ្នាំ។

ពាក់ព័ន្ធនឹងជំនួបរបស់លោករដ្ឋមន្ត្រីថ្មីវិញ ប្រភពពីក្រសួងការបរទេសទួរគី បានបង្ហើបឲ្យដឹងថា ការពិភាក្សា រវាងលោក Wang និងរដ្ឋមន្ត្រីការបរទេសទួរគីលោក Hakan Fidan រួមមានស្ថានភាពចុងក្រោយនៅក្នុងប្រទេសអ៊ុយក្រែន ក៏ដូចជាប្រព័ន្ធហិរញ្ញវត្ថុពិភពលោកផងដែរ។

ជាមួយគ្នានេះ នៅក្នុងសេចក្តីថ្លែងការណ៍មួយដែលបានចេញផ្សាយបន្ទាប់ពីកិច្ចពិភាក្សា ការិយាល័យរបស់លោកប្រធានាធិបតីទួរគី បានឲ្យដឹងថា Wang និងលោក Erdogan បានសម្តែងក្តីសង្ឃឹមថា ប្រទេសចិន និងប្រទេសទួរគី នឹងពង្រឹងកិច្ចសហប្រតិបត្តិការរបស់ខ្លួន ខណៈដែលប្រទេសទាំង២ ដើរតួយ៉ាងសំខាន់ក្នុងការដោះស្រាយបញ្ហាពិភពលោក និងតំបន់៕