ព្រះអង្គម្ចាស់ Harry នឹងទ្រង់ចង់ជ្រាប នៅថ្ងៃព្រហស្បតិ៍ (ទី២៧ ខែកក្កដា) នេះថា តើបណ្តឹងរបស់ទ្រង់ប្រឆាំងនឹងក្រុមសារព័ត៌មានចក្រភពអង់គ្លេសរបស់លោក Rupert Murdoch អាចទទួលបានការកាត់ក្ដីដែរ ឬអត់ ដោយបណ្ដឹងនោះ ទ្រង់បានចោទប្រកាន់ពីបទលួចស្តាប់ទូរស័ព្ទ និងសកម្មភាពខុសច្បាប់ផ្សេងទៀត។

ព្រះអង្គម្ចាស់ Harry ដែលជាព្រះរាជបុត្រាពៅរបស់ព្រះមហាក្សត្រ Charles កំពុងប្តឹងស្ថាប័នសារព័ត៌មាន News Group Newspapers (NGN) នៅតុលាការកំពូលក្នុងទីក្រុងឡុងដ៍ ជុំវិញអំពើខុសច្បាប់ជាច្រើនដែលព្រះអង្គមានព្រះបន្ទូលថា ត្រូវបានធ្វើឡើងដោយអង្គភាពសារព័ត៌មានរបស់ខ្លួនគឺសារព័ត៌មាន The Sun និងអង្គភាពសារព័ត៌មានដែលលែងដំណើរការហើយ News of the World គិតចាប់ពីពាក់កណ្តាលទសវត្សរ៍ឆ្នាំ១៩៩០ រហូតដល់ឆ្នាំ២០១៦។

កាលពីខែមេសា អង្គភាព NGN (NWSA.O) បានស្វះស្វែងរកឲ្យមានការដកពាក្យបណ្តឹងចេញ ដោយលើកហេតុផលថា ករណីនេះគួរតែត្រូវបានប្ដឹងឲ្យឆាប់ៗជាងនេះ។ ចៅក្រមលោក Timothy Fancourt នឹងប្រកាសសាលក្រម នៅល្ងាចថ្ងៃព្រហស្បតិ៍នេះ ថាតើបណ្ដឹងនេះ អាចបន្តដំណើរការសវនាករ ដែលនឹងត្រូវចាប់ផ្តើមនៅខែមករាឆ្នាំក្រោយ ឬយ៉ាងណា។

ក្នុងឆ្នាំ២០១២ ក្រុមអ្នកសារព័ត៌មាននេះ បានចេញការសុំអភ័យទោសទទួលកំហុស សម្រាប់ការលួចស្តាប់យ៉ាងទូលំទូលាយ ពីសំណាក់អ្នកសារព័ត៌មានរបស់អង្គភាព News of the World ដែលលោក Murdoch ត្រូវបង្ខំចិត្តបិទ ចំពេលមានប្រតិកម្មខ្លាំង ប៉ុន្តែក្រុមតំណាងនោះបដិសេធរាល់ការចោទប្រកាន់ថា មិនមានការធ្វើខុសណាមួយ ដោយបុគ្គលិករបស់សារព័ត៌មាន The Sun នោះទេ៕