អ៊ីស្រាអែល៖ កាលពីថ្ងៃពុធ ប្រទេសអ៊ីស្រាអែលបានបង្ហើបថា ខ្លួនបានប្ដេជ្ញាចិត្តបន្តសកម្មភាពវាយប្រហាររបស់ខ្លួន ប្រឆាំងនឹងក្រុមសកម្មប្រយុទ្ធហាម៉ាស់ បន្ទាប់ពីលោកប្រធានាធិបតីអាមេរិក Joe Biden បានអំពាវនាវឲ្យបញ្ឈប់ជម្លោះនេះ។
សេតវិមានបាននិយាយនៅក្នុងសេចក្ដីថ្លែងការណ៍មួយថា លោកប្រធានាធិបតី Biden បានប្រាប់លោកនាយករដ្ឋមន្ត្រីអ៊ីស្រាអែល Benjamin Netanyahu ថា លោករំពឹងថានឹងមានភាពធូរស្រាលខ្លាំងនៅថ្ងៃនេះ ជាផ្លូវឆ្ពោះទៅរកបទឈប់បាញ់នៅក្នុងអំពើហិង្សាដ៏ធ្ងន់ធ្ងរនេះ។ ក្រោយមកលោក Netanyahu បានបញ្ចេញសេចក្ដីថ្លែងការណ៍តាមវីដេអូ នៅលើបណ្ដាញសង្គម Twitter ដោយនិយាយថា លោកនៅតែប្ដេជ្ញាចិត្តបន្តប្រតិបត្តិការនេះ លុះត្រាតែសម្រេចកិច្ចការក្នុងការស្ដារឲ្យភាពស្ងប់ស្ងាត់ និងសន្តិសុខឡើងវិញចំពោះអ្នកគ្រប់គ្នា ក៏ដូចជាពលរដ្ឋអ៊ីស្រាអែល។
យោងតាមប្រភពផ្លូវការនានានៅក្នុងតំបន់ហ្គាហ្សា និងអ៊ីស្រាអែល មនុស្សយ៉ាងហោចណាស់ ២២៧នាក់បានស្លាប់ក្នុងតំបន់ហ្គាហ្សា ក្នុងការវាយប្រហារតាមអាកាសដ៏ខ្លាំងក្លារយៈពេល ១០ថ្ងៃ រួមទាំងកុមារ ៦៤នាក់ ខណៈដែលការបាញ់ប្រហារដោយគ្រាប់រ៉ូកែត បានសម្លាប់ពលរដ្ឋអ៊ីស្រាអែលចំនួន ១២នាក់។ ការអំពាវនាវពីអន្តរជាតិឲ្យមានបទឈប់បាញ់ភ្លាមៗ និងជួយការពារជនស៊ីវិលនៅក្នុងតំបន់រងការឡោមព័ទ្ធប៉ាឡេស្ទីន កំពុងកើនឡើងកាន់តែច្រើន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
