នាយករដ្ឋមន្ត្រីស៊ុយអែត លោក Ulf Kristersson បាននិយាយ កាលពីថ្ងៃព្រហស្បតិ៍ (ទី២៧ ខែកក្កដា) ថា លោកមាន«ការបារម្ភយ៉ាងខ្លាំង» អំពីផលវិបាកនានា ប្រសិនបើបាតុកម្មមានកាន់តែច្រើនឡើងៗ ដែលសម្ដែងការប្រមាថដល់គម្ពីរកូរ៉ាននោះ ស្របពេលកំហឹងរបស់ពលរដ្ឋម៉ូស្លីម កាន់តែកើនឡើងដែរ ចំពោះការវាយប្រហារជាបន្តបន្ទាប់លើសៀវភៅពិសិដ្ឋរបស់អ្នកកាន់សាសនាអ៊ីស្លាមនេះ។

ការបំពានលើគម្ពីរកូរ៉ាន នៅក្នុងប្រទេសស៊ុយអែត និងដាណឺម៉ាក បានធ្វើឲ្យប្រទេសម៉ូស្លីមជាច្រើនផ្ទុះកំហឹង ក្នុងនោះរួមទាំងប្រទេសទួរគី ដែលការគាំទ្ររបស់ប្រទេសនេះ ជួយស៊ុយអែតឲ្យបានចូលរួមជាមួយអង្គការសន្ធិសញ្ញាអាត្លង់ទិកខាងជើង (NATO) ដែលជាបំណងប្រាថ្នារបស់ទីក្រុង Stockholm បន្ទាប់ពីមានការលុកលុយរបស់រុស្ស៊ីលើអ៊ុយក្រែន ក្នុងឆ្នាំ២០២២។

លោក Kristersson បានប្រាប់ទីភ្នាក់ងារសារព័ត៌មានស៊ុយអែត TT ថា សំណើជាច្រើនថែមទៀត ត្រូវបានដាក់ទៅនគរបាល ដើម្បីសុំអនុញ្ញាតធ្វើបាតុកម្ម ដែលជាការគ្រោងប្រមូលផ្ដុំ ដើម្បីប្រមាថមើលងាយដល់គម្ពីរកូរ៉ាន។ លោកបាននិយាយថា៖ «ប្រសិនបើអ្នកស្នើសុំទាំងនោះ ត្រូវបានអនុញ្ញាតនោះ ថ្ងៃណាមួយ យើងនឹងប្រឈមជាមួយហានិភ័យយ៉ាងជាក់លាក់ ដែលរឿងរ៉ាវធ្ងន់ធ្ងរកើតឡើង។ ខ្ញុំបារម្ភយ៉ាងខ្លាំងអំពីអ្វីដែលអាចនាំឲ្យកើតរឿងរ៉ាវធ្ងន់ធ្ងរនោះ»។

តែយ៉ាងណាក្ដី លោកនាយករដ្ឋមន្ត្រី Kristersson បានបញ្ជាក់ថា ការសម្រេចថា តើត្រូវផ្តល់ការអនុញ្ញាតឲ្យមានបាតុកម្ម ឬអត់នោះ គឺអាស្រ័យលើនគរបាល។

សូមបញ្ជាក់ថា កាលពីថ្ងៃទី២០ ខែកក្កដា ស្ថានទូតស៊ុយអែតនៅទីក្រុងបាកដាដ ប្រទេសអ៊ីរ៉ាក់ ត្រូវបានលុកលុយ និងបានយកភ្លើងដុតពីសំណាក់ក្រុមអ្នកតវ៉ា ដែលខឹងសម្បា ចំពោះការដុតកូរ៉ានដែលបានគ្រោងទុក។

ប្រទេសដាណឺម៉ាក និងស៊ុយអែត បាននិយាយថា ពួកគេមិនពេញចិត្ត ចំពោះទង្វើដុតគម្ពីរកូរ៉ាននេះទេ ប៉ុន្តែមិនអាចទប់ស្កាត់សកម្មភាពនោះបាន ដោយសារអ្នកប្រព្រឹត្តស្ថិតនៅក្រោមច្បាប់ការពារសិទ្ធិបញ្ចេញមតិ ហើយស៊ុយអែតបានចោទប្រកាន់ប្រទេសឯទៀត ដូចជារុស្ស៊ីជាដើម ថាបានរៀបឧបាយកលបង្កើតវិបត្តិ ដើម្បីបំផ្លាញផលប្រយោជន៍ និងប្រឹងប្រែងរបស់ខ្លួន ដើម្បីចូលរួមជាមួយអង្គការ NATO៕