ប្រធានាធិបតីឥណ្ឌូនេស៊ីលោក ចូកូ វីដូដូ ( Joko Widodo) បានជួបជាមួយប្រធានាធិបតីចិន លោក ស៊ី ជីនពីង (Xi Jinping) កាលពីថ្ងៃព្រហស្បតិ៍ នៅភាគនិរតីនៃប្រទេសចិនសម្រាប់ការពិភាក្សាអំពីគម្រោងរួមគ្នា ដែលរួមមានការអភិវឌ្ឍរដ្ឋធានីថ្មីមួយរបស់ប្រទេសឥណ្ឌូនេស៊ី។

រដ្ឋមន្ត្រីការបរទេសឥណ្ឌូនេស៊ី លោកស្រី រេណូ ម៉ាស៊ូឌី (Retno Marsudi) បាននិយាយថា រដ្ឋាភិបាលនៃប្រទេសចិននិងឥណ្ឌូនេស៊ី បានចុះហត្ថលេខាលើកិច្ចព្រមព្រៀងជាច្រើន រួមទាំងការផ្លាស់ប្តូរចំណេះដឹង និងបទពិសោធន៍សម្រាប់គម្រោងដើមទុន។ ប្រទេសឥណ្ឌូនេស៊ី គ្រោងនឹងផ្លាស់ប្តូររដ្ឋធានីរបស់ខ្លួនពីទីក្រុងហ្សាការតា( Jakarta) ដែលមានការកកស្ទះ និងបំពុលនៅលើកោះជ្វា (Java) ទៅកាន់ប្រជុំកោះនូសានតារ៉ា (Nusantara) នៅលើកោះ Borneo (ប៊័រនីអូ) នៅឆ្នាំក្រោយ។

ក្នុងអំឡុងកិច្ចប្រជុំរនៅទីក្រុង Chengdu ( ឆឹងទូ) មេដឹកនាំទាំងពីរ ក៏បានពិភាក្សាអំពីការវិនិយោគ កិច្ចសហប្រតិបត្តិការលើវិស័យមួយចំនួនដូចជា សុខភាព ការស្រាវជ្រាវ និងបច្ចេកវិទ្យា និងបញ្ហាក្នុងតំបន់ រួមទាំងទំនាក់ទំនងរបស់ប្រទេសចិនជាមួយសមាគមប្រជាជាតិអាស៊ីអាគ្នេយ៍ផងដែរ នេះបើយោងតាមសេចក្តីថ្លែងការណ៍របស់លោកវីដូដូ។

ប្រធានាធិបតីឥណ្ឌូនេស៊ីដែលប្រទេសរបស់លោក កាន់តំណែងជាប្រធានអាស៊ាននៅឆ្នាំនេះ បានថ្លែងថា «ឥណ្ឌូ-ប៉ាស៊ីហ្វិក គឺជាតំបន់យុទ្ធសាស្ត្រ ដែលយើងត្រូវការពារជាតំបន់សន្តិភាព និងស្ថិរភាព»។