ក្រុមហ៊ុន Netflix បានបង្កឱ្យមានការឆ្លើយតបទាំងកំហឹងពីក្រុមកូដកម្មរបស់តារាហូលីវូដ និងអ្នកនិពន្ធ បន្ទាប់ពីបានប្រកាសផ្សាយពាណិជ្ជកម្មការងារសម្រាប់អ្នកជំនាញខាងប្រព័ន្ធបច្ចេកវិទ្យាប្រាជ្ញាសិប្បនិម្មិត(AI)។ មុខតំណែងថ្មីនេះនឹងចូលរួមជាមួយក្រុមកម្មវិធី Machine Learning Platform របស់ខ្លួន ដែលជំរុញឱ្យប្រព័ន្ធដំណើរការក្បួនដោះស្រាយរបស់ក្រុមហ៊ុន Netflix ជួយអ្នកទស្សនាក្នុងការជ្រើសរើសកម្មវិធីថ្មីៗដើម្បីកម្សាន្ត។

ក្រុមហ៊ុននេះបានដាក់ប្រាក់បៀវត្ស៍ចំពោះមុខតំណែងនេះរហូតដល់ ៩០០.០០០ដុល្លារក្នុងមួយឆ្នាំ ដែលជំរុញឱ្យមានកំហឹងបន្ថែមទៀតពីក្រុមកូដកម្មហូលីវូដ។ សហជីពហូលីវូដកំពុងធ្វើកូដកម្មជុំវិញការព្រួយបារម្ភអំពីបញ្ហាដែលប្រព័ន្ធបច្ចេកវិទ្យា AI អាចបង្កផលប៉ះពាល់ដល់ឧស្សាហកម្មកម្សាន្ត និងប្រាក់ខែរបស់មនុស្ស។

បញ្ជីការងារ ដែលត្រូវបានរាយការណ៍ដំបូងដោយក្រុមហ៊ុនការងារ The Intercept កាលពីថ្ងៃអង្គារ គឺជាបញ្ជីមួយក្នុងចំណោមបញ្ជីការងារជាច្រើននៅលើទំព័រការងាររបស់ក្រុមហ៊ុន Netflix ដែលជ្រើសរើសបេក្ខជនដែលមានបទពិសោធន៍ក្នុងការរៀនម៉ាស៊ីន (ML) និងប្រព័ន្ធបច្ចេកវិទ្យា AI។

ការពិពណ៌នានៃការងារហាក់ដូចជាណែនាំថា តួនាទីទាំងនោះនឹងរួមបញ្ចូលការប្រើប្រាស់បច្ចេកវិទ្យា AI ដើម្បីវាយតម្លៃតម្រូវការថវិកាសម្រាប់កម្មវិធីផ្សេងៗ។

នេះគឺជាកង្វល់ដ៏សំខាន់របស់សហជីពតំណាងឱ្យក្រុមតារាសម្ដែងនៃសហព័ន្ធទូរទស្សន៍ Sag-Aftra ដែលបាននិយាយអំពីការភ័យខ្លាចរបស់ខ្លួនដែលថា ប្រព័ន្ធដំណើរការក្បួនដោះស្រាយនោះមានថាមពលខ្លាំងពេក។ ក្រុមហ៊ុន Netflix បានបដិសេធមិនធ្វើអត្ថាធិប្បាយអំពីបញ្ជីការងារនេះទេ ប៉ុន្តែធ្លាប់បាននិយាយថា ប្រព័ន្ធបច្ចេកវិទ្យាប្រាជ្ញាសិប្បនិម្មិត AI នឹងមិនជំនួសដំណើរការច្នៃប្រឌិតរបស់មនុស្សនោះទេ៕