​បាល់ទាត់៖ ​ក្រុមបាល់ទាត់​បារាំង Paris Saint Germain ​បាន​គ្រង​ជើងឯក​ការប្រកួត​ពានរង្វាន់ Coupe de France រឺ French Cup លើក​ទី៦ ក្នុងចំណោម ៧រដូវ​កាល​ចុងក្រោយ​បន្ទាប់ពី​ជ័យជំនះ ២-០ លើ Monaco នៅ​វគ្គ​ផ្តាច់ព្រ័ត្រ​យប់​ថ្ងៃ​ពុធ​ម្សិលមិញ​។

​​ខ្សែប្រយុទ្ធ​អា​ហ្ស​ង់​ទីន Mauro Icardi ​ជា​អ្នកបើក​ការនាំ​មុខ​អោយ​ក្រុម​របស់លោក Mauricio Pochettino ​នៅ​នាទី​ទី១៩ មុន​ពេលដែល​ខ្សែប្រយុទ្ធ​បារាំង Kylian Mbappe ​ជា​អ្នក​ស៊ុត​គ្រាប់​ធានា​ជ័យជំនះ​នៅ​នាទី​ទី៨១​។ ​​តាំងពី​ឆ្នាំ២០១៥ Paris Saint Germain ​បាន​យកឈ្នះ​ពាន Coupe de France ជាប់​គ្នា​អាក់​ខាង​តែ​ឆ្នាំ២០១៩ ប៉ុណ្ណោះ​ដែល​ចាញ់ Rennes នៅ​វគ្គ​ផ្តាច់​ព្រ័ត្រ​។ ​​PSG នៅតែ​ជា​ក្រុម​ដែល​ឈ្នះ​ពាន Coupe de France នេះ​ច្រើនជាងគេ​ដល់​ទៅ ១៤លើក ​ខណៈ Marseille ១០លើក, Saint Etienne ៦លើក និង Lille ៦លើក​។ ​​នេះ​ជា​ពាន​ទី២ ផងដែរ​របស់ PSG ក្រោម​ការដឹកនាំ​របស់​អតីត​អ្នកចាត់ការ Spurs, Mauricio Pochettino បន្ទាប់​ពីលើ​កពាន Trophee des Champions កាលពី​ខែមករា​។

​​ក្រុម​ការពារ​តំណែង​ជើងឯក​ក្របខណ្ឌ​លី​គ​កំពូល​បារាំង​មួយ​នេះ​ កំពុង​ដេញ​ពីក្រោយ​ក្រុម​កំពូល​តារាង Lille ១ពិន្ទុ ខណៈ​ក្របខណ្ឌ​បារាំង Ligue 1 នឹង​បិទ​បញ្ចប់​រដូវ​កាល​នេះ​ដោយ PSG ទៅ​ទឹកដី Brest ឯ Lille ទៅ​ទឹកដី Angers ចុង​សប្តាហ៍​នេះ​៕

​អត្ថបទ​៖​នាង សុភា​វុ​ធ