តុលាការជប៉ុន នៅថ្ងៃចន្ទ (ទី៣១ ខែកក្កដា) នេះ បានកាត់ទោសបុរសម្នាក់ឲ្យជាប់ពន្ធនាគារ ២៣ឆ្នាំ បន្ទាប់ពីរកឃើញថា រូបគេមានពិរុទ្ធពីបទប៉ុនប៉ងមនុស្សឃាត និងបានដុតភ្លើង នៅលើរថភ្លើង ក្នុងទីក្រុងតូក្យូ ខណៈដែលស្លៀកពាក់ដូចតួដែលមានមុខមាត់អាក្រក់ ក្នុងសៀវភៅរឿងកំប្លែង «Joker»។

អ្នកនាំពាក្យតុលាការ បានប្រាប់ទីភ្នាក់ងារសារព័ត៌មាន AFP ថា សាលក្រមសម្រាប់ការវាយប្រហារថ្ងៃបុណ្យ Halloween ឆ្នាំ២០២១ ត្រូវចេញដោយសាខានៅក្រុង Tachikawa របស់តុលាការក្រុងតូក្យូ។

សារព័ត៌មាន Jiji Press និងប្រព័ន្ធផ្សព្វផ្សាយ ក្នុងស្រុកផ្សេងទៀត បានឲ្យដឹងថា លោក Kyota Hattori វ័យ ២៦ឆ្នាំ ត្រូវបានកាត់ទោសពីបទចាក់សម្លាប់អ្នកដំណើរប្រុសម្នាក់វ័យ ៧០ឆ្នាំ ហើយព្យាយាមសម្លាប់មនុស្ស ១២នាក់ផ្សេងទៀត ដោយដុតភ្លើងនៅខាងក្នុងរថភ្លើង។ លោក Hattori ត្រូវបានគេរាយការណ៍ថា បានប្រាប់អ្នកស៊ើបអង្កេតថា រូបគេចង់សម្លាប់មនុស្ស ដើម្បីទទួលបានទោសប្រហារជីវិត។ អ្នកទោសរូបនេះ ក៏បានប្រាប់ទៀតថា រូបគេបានលាបឥន្ធនៈរាវស្រាល ក្នុងរថភ្លើងទៀតផង។

ឧក្រិដ្ឋកម្មហិង្សា គឺកម្រកើតមាន នៅប្រទេសជប៉ុន ប៉ុន្តែមានការវាយប្រហារដោយចាក់ និងសូម្បីតែការបាញ់ប្រហារម្តងម្កាល ដោយក្នុងនោះរួមទាំងការធ្វើឃាតលើអតីតនាយករដ្ឋមន្ត្រី លោក Shinzo Abe កាលពីឆ្នាំមុនផងដែរ។

កាលពីខែសីហា ឆ្នាំ២០២១ មនុស្សចំនួន ៩នាក់ បានរងរបួស ដោយម្នាក់ក្នុងចំណោមនោះមានសភាពធ្ងន់ធ្ងរ ពីការវាយប្រហារដោយចាក់លើរថភ្លើងធ្វើដំណើរក្នុងទីក្រុងតូក្យូ ដោយជនសង្ស័យក្រោយមកបានប្រគល់ខ្លួន បន្ទាប់ពីបានរត់គេចពីកន្លែងកើតហេតុ។ ក្នុងការវាយប្រហារដាច់ដោយឡែកមួយក្នុងខែដដែលនោះ មនុស្ស ២នាក់បានរងប្រហារដោយជះទឹកអាស៊ីត នៅស្ថានីយរថភ្លើងក្រោមដីក្រុងតូក្យូ៕