គណបក្ស នៅក្នុងសម្ព័ន្ធភាពរបស់ប្រទេសថៃ បាននិយាយ នៅថ្ងៃពុធ (ទី២ ខែសីហា) នេះ ថា គណបក្សបោះជំហានទៅមុខ (Move Forward) ដែលឈ្នះការបោះឆ្នោត ត្រូវបានដកចេញពីសម្ព័ន្ធភាពពីក្រុមគណបក្សចម្រុះដែលសង្ឃឹមថា នឹងបង្កើតរដ្ឋាភិបាលបន្ទាប់ ក្រោយការបោះឆ្នោតសកលខែឧសភា។

ប្រទេសថៃ ដែលមានសេដ្ឋកិច្ចធំជាងគេទី២ របស់តំបន់អាស៊ីអាគ្នេយ៍ បានស្ថិតក្នុងភាពមិនច្បាស់លាស់ផ្នែកនយោបាយ គិតចាប់តាំងពីសំឡេងឆ្នោតសរុប បានបង្ហាញថា គណបក្សបោះជំហានទៅមុខ (Move Forward) បានលេចឡើង ក្នុងនាមជាគណបក្សលេចធ្លោជាងគេ ដែលតាមមកពីក្រោយយ៉ាងកៀកកិតដោយគណបក្សភឿថៃ (Pheu Thai)។

គណបក្សភឿថៃ (Pheu Thai) ជាមរតកចុងក្រោយបង្អស់ដែលបង្កើតឡើងដោយអតីតមហាសេដ្ឋីទូរគមនាគមន៍ លោក ថាក់ស៊ីន ស៊ីណាវ៉ាត់ (Thaksin Shinawatra) បាននិយាយថា ខ្លួននឹងតែងតាំងអ្នកជំនួញម្នាក់ឈ្មោះ សេដ្ឋា ថាវីស៊ីន (Srettha Thavisin) នៅក្នុងការបោះឆ្នោតសភា សម្រាប់តំណែងនាយករដ្ឋមន្ត្រី ដែលនឹងកំណត់នៅថ្ងៃសុក្រនេះ ហើយគណបក្សមានគោលបំណងបង្កើតរដ្ឋាភិបាល ដោយមិនមានគណបក្សបោះជំហានទៅមុខ។

គណបក្សភឿថៃ (Pheu Thai) បានឲ្យដឹងថា៖ «ដោយពិគ្រោះយោបល់ជាមួយគណបក្សបោះជំហានទៅមុខ (Move Forward) គណបក្សភឿថៃ (Pheu Thai) នឹងដកខ្លួនចេញពីកិច្ចសហប្រតិបត្តិការ ហើយនឹងបន្តដំណើរទៅមុខជាមួយនឹងការបង្កើតរដ្ឋាភិបាល និងតែងតាំងលោក Srettha Thavisin សម្រាប់តំណែងនាយករដ្ឋមន្ត្រី»។

ពាក់ព័ន្ធនឹងករណីនេះ អ្នកនាំពាក្យរបស់គណបក្សបោះជំហានទៅមុខ (Move Forward) បាននិយាយថា គណបក្សនឹងធ្វើការអត្ថាធិប្បាយបន្ទាប់ពីក្រុមអ្នកច្បាប់របស់គណបក្ស បានជួបប្រជុំគ្នានៅថ្ងៃពុធនេះ។

គណបក្សបោះជំហានទៅមុខ (Move Forward) បានដឹកនាំគណបក្សឯទៀត ក្នុងសម្ព័ន្ធភាព ក្នុងកិច្ចប្រឹងប្រែង ដើម្បីបង្កើតរដ្ឋាភិបាលបន្ទាប់ ក្រោយការបោះឆ្នោតថ្ងៃទី១៤ ខែឧសភា ដែលបង្ហាញឲ្យឃើញថា អ្នកបោះឆ្នោតជាច្រើន បានទម្លាក់សំឡេងឆ្នោតរបស់ខ្លួនបដិសេធការគ្រប់គ្រងជាងមួយទសវត្សរ៍ ដោយក្រុមយោធា និងរដ្ឋាភិបាលដែលគាំទ្រដោយយោធា។

ប៉ុន្តែការប៉ុនប៉ង ២ដងរបស់គណបក្សឈ្នះឆ្នោត ដើម្បីឲ្យមេដឹកនាំរបស់ខ្លួន គឺលោក Pita Limjaroenrat ជាប់ជានាយករដ្ឋមន្ត្រី ដោយការទទួលបានសំឡេងគាំទ្រពីសភានោះ ត្រូវបានរារាំងដោយគូប្រជែងអភិរក្សនិយម និងព្រឹទ្ធសភាដែលតែងតាំងដោយក្រុមយោធា៕