ភ្នំពេញ៖ តាមរយៈភាពជាដៃគូជាមួយ សហភាពអឺរ៉ុប (EU) និងអង្គការ UNIDO រដ្ឋបាលជលផល បានប្រកាសជាផ្លូវការអំពីការប្រគល់វិញ្ញាបនបត្រនិមិត្តសញ្ញាគុណភាពផល ផលិតផលជលផលកម្ពុជា CQS ដែលជាប្រព័ន្ធវិញ្ញាបនប័ត្រសុវត្ថិភាពម្ហូបអាហារដំបូងគេបំផុតសម្រាប់វិស័យជលផលនៅកម្ពុជា ជូនដល់សហគ្រាសកែច្នៃផល ផលិតផលជលផល។

ឯកឧត្តម ចាន់ សុផា អគ្គនាយកវិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ក្រោយចប់ពិធីប្រគល់វិញ្ញាបនបត្រនិមិត្តសញ្ញា CQS នៅព្រឹកថ្ងៃទី៣ សីហា ឆ្នាំ២០២៣នេះថា CQS គឺជាប្រព័ន្ធវិញ្ញាបនប័ត្រសុវត្ថិភាពម្ហូបអាហារដំបូងគេបំផុតសម្រាប់វិស័យជលផលនៅកម្ពុជា ក្រោមការដឹកនាំផ្ទាល់របស់រដ្ឋបាលជលផល តាមរយៈគម្រោង CAPFISH-Capture។ ឯកឧត្តម បានឲ្យដឹងទៀតថា ប្រព័ន្ធវិញ្ញាបនបត្រ CQSនេះដែរ ត្រូវបានបង្កើតឡើងដើម្បីបង្កើនភាពប្រកួតប្រជែងរបស់ផល ផលិតផលជលផលកម្ពុជា ការពារសុខភាពសាធារណៈ និងសម្រួលដល់ការធ្វើពាណិជ្ជកម្មជាលក្ខណៈអន្តរជាតិ។

នៅក្នុងពិធីនេះ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ដើម្បីធានាបានទំនុកចិត្ត និងសុចរិតភាពនៃប្រព័ន្ធវិញ្ញាបនបត្រ CQS រដ្ឋបាលជលផល និងអង្គការ UNIDO ដោយមានជំនួយបច្ចេកទេសពីក្រុមហ៊ុនប្រឹក្សាយោបល់ បានរៀបចំបង្កើតបទបញ្ញត្តិ គោលការណ៍ណែនាំបច្ចេកទេស និងឯកសារពាក់ព័ន្ធនានាប្រកបដោយតម្លាភាព និងគ្រប់ជ្រុងជ្រោយ។ ឯកឧត្តម បានបញ្ជាក់ថា សវនករដែលជាមន្ត្រីរបស់រដ្ឋបាលជលផល និងស្ថាប័នរដ្ឋផ្សេងទៀតត្រូវបានបណ្តុះបណ្តាល និងមានគុណវុឌ្ឈគ្រប់គ្រាន់សម្រាប់ធ្វើសវនកម្ម CQS។

ដោយឡែក លោក ប្រាយអែន ហ្វ័រណារី (Bryan FORNARI) ប្រធានផ្នែកកិច្ចសហប្រតិបត្តិការ ប្រតិភូសហភាពអឺរ៉ុបប្រចាំនៅកម្ពុជា បានលើកឡើងថា តាមរយៈការបំពេញការងារ និងសហការជាមួយស្ថាប័នរដ្ឋ និងវិស័យឯកជន យើងអាចរួមចំណែកផ្តល់ធានាឲ្យមាននូវផលិតផលមានគុណភាពស្របតាមស្តង់ដារ មានសុវត្ថិភាព បើកចំហឱកាសក្នុងការធ្វើធុរកិច្ចបានកាន់តែប្រសើរ ជាពិសេសផ្តល់ការងារសមរម្យនៅក្នុងអាជីវកម្មម្ហូបអាហារ។កិច្ចខិតខំប្រឹងប្រែងទាំងនេះ ជួយការពារអ្នកប្រើប្រាស់ពីហានិភ័យផ្នែកសុខភាពផ្សេងៗ។លោកបន្ថែមថា កម្មវិធីជំរុញកំណើនជលផលប្រកបដោយចីរភាព និងបរិយាប័ន្នក្រោមថវិកាគាំទ្ររបស់ សហភាពអឺរ៉ុប នៅតែបន្តធ្វើការជាមួយក្រសួងកសិកម្ម ដើម្បីធ្វើឲ្យប្រសើរឡើងនូវអនុលោមភាពសុវត្ថិភាព ម្ហូបអាហារ។ ការណ៍នេះ នឹងជួយឱ្យផល ផលិតផលជលផលកម្ពុជាអាចបោះជំហានជាបណ្តើរៗចូលទៅកាន់ទីផ្សារសហភាពអឺរ៉ុប និងទីផ្សារអន្តរជាតិផ្សេងទៀត។

សូមបញ្ជាក់ថា សម្រាប់ជុំទី១ នៃការប្រគល់វិញ្ញាបនបត្រនិមិត្តសញ្ញាគុណភាពផល ផលិតផលជលផលកម្ពុជា CQSនេះ រដ្ឋបាលជលផល បានប្រគល់វិញ្ញាបនបត្រដល់សហគ្រាសចំនួន ៨ ដែលអនុវត្តបានយ៉ាងខ្ជាប់ខ្ជួន ស្របតាមលក្ខខណ្ឌតម្រូវនៃ CQS រួមមាន៖ សហគ្រាសលាងឡេង, សហគ្រាសផលិតទឹកត្រីនីអៀងណេង, សិប្បកម្មសំណាង សុធា, សហគ្រាសហូមថេសហ្វូត, សហគ្រាសភ្នំពេជ្រប៊ុន, សហគ្រាសធឿនស្រី, សិប្បកម្មកែច្នៃវង្សតារា និងសិប្បកម្មកែច្នៃហេងហ៊ត់៕ ដោយ ៖ បូរ៉ារី