មណ្ឌលគិរី៖ ផ្លូវជាតិលេខ៧៦ តភ្ជាប់ពីស្រុកស្នួលខេត្តក្រចេះ ឆ្ពោះមកខេត្តមណ្ឌលគិរី ត្រង់​ចំណុច​បាក់​ស្រុត​កាលពីប៉ុន្មានថ្ងៃមុន អាចធ្វើដំណើរឆ្លងកាត់បានហើយ ខណៈមន្ត្រី​ជំនាញ​កំពុង​ប្រើ​ប្រាស់​គ្រឿង​ចក្រជាច្រើនគ្រឿង សម្រុកឈូសឆាយផ្លូវវៀងឲ្យឆាប់រួចរាល់ ។

ឯកឧត្ដម ថង សាវុន អភិបាលខេត្តមណ្ឌលគិរី បានជូនដំណឹងថា សាធារណៈជន និង​ភ្ញៀវ​ទេសចរ​ជាតិ​ អន្តរជាតិ ដែលមកលេងកំសាន្តនៅខេត្តមណ្ឌលគិរី អាចធ្វើចរាចរណ៍តាមផ្លូវវាង នៅ​ចំណុច​អូរងើយបានហើយ បន្ទាប់ពីក្រុមការងារមន្ទីរសាធារណការ និងដឹកជញ្ជូនខេត្តមណ្ឌលគិរី បាន​យក​ចិត្តទុកដាក់ឈូសឆាយផ្លូវវាងថ្មី ជូនដល់ប្រជាពលរដ្ឋប្រើប្រាស់ជាបណ្តោះអាសន្ន។

លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្ត បានឲ្យដឹងថា ផ្លូវជាតិលេខ៧៦ ដែល​តភ្ជាប់ពីស្រុកស្នួល ខេត្តក្រចេះ ឆ្ពោះមកខេត្តមណ្ឌលគិរី ត្រង់ចំណុចបាក់ស្រុត អូរងើយ ក្នុង​ភូមិ​សាស្រ្តស្រុកអូររាំង កាលពីប៉ុន្មានថ្ងៃមុន រហូតមកដល់វេលាម៉ោង៦ល្ងាច ថ្ងៃទី០៦ ខែ​សីហា​នេះ ក្រុមការងារជំនាញ បានឈូសឆាយផ្លូវវាងរួចរាល់ជាបណ្តោះអាសន្ន ដែល​អាច​ឲ្យ​រថយន្ត​ឆ្លង​កាត់​បាន​ហើយ។ លោក បញ្ជាក់ថា ផ្លូវវាង ដែលកំពុងស្ថាបនា មានប្រវែងប្រមាណ ១០០០ម៉ែត្រ នឹង​រៀបចំចាក់ថ្មម៉ិចកិនបង្ហាប់ អាចស្ថាបនារួចរាល់ទាំងស្រុង នាពេលខាងមុខនេះ។

គួររម្លឹកដែរថា នៅលើដងផ្លូវជាតិលេខ៧៦ ចន្លោះគីឡូម៉ែត្រលេខ៩១ ដល់គីឡូម៉ែត្រ៩៩ ក្នុង​ភូមិ​អណ្ដូង​ក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី កាលពីល្ងាចថ្ងៃទី០១ ខែសីហា ឆ្នាំ​២០២៣ បានកើតមានព្រឹត្តិការណ៍ដ៏តក់ស្លុត គឺការបាក់​ស្រុត​ដី​លើ​ដង​ផ្លូវ​ធ្លាក់​ចូល​ទៅ​ក្នុង​ជ្រោះ​ខាង​ក្រោម បង្កឲ្យមានការភ្ញាក់ផ្អើលយ៉ាងខ្លាំង ប៉ុន្តែ​សំណាង​ល្អ​ណាស់​ដែល​មន្ត្រី​ជំនាញ​ខេត្ត​មណ្ឌល​គិរី​បានរកឃើញស្នាមប្រេះលើដងផ្លូវមុនការបាក់ស្រុត ហើយ​ឯកឧត្ដម​អភិបាល​ខេត្ត​មណ្ឌល​គិរីបា​នបញ្ជាឲ្យបិទផ្អាកចរាចរណ៍ឆ្លងកាត់បន្ទាន់ ទើបប៉ុន្មាន​ម៉ោង​ក្រោយ​មក​ក្នុង​ហេតុការណ៍​បាក់​ស្រុតផ្លូវ មិនមានបណ្ដាលឲ្យគ្រោះថ្នាក់ដល់អ្នកដំណើរនោះទេ៕ អត្ថបទ៖ អ៊ិត ភីរុណ