​បាល់ទាត់៖ ​ខ្សែ​ការពារ​ក្លិប​ជប៉ុន Yokohama F. Marinos, Theerathon Bunmathan បាន​សំរេច​ចិត្ត​ដក​ខ្លួន​ពី​ក្រុម​ជំរើស​ជាតិ​ថៃ​សំរាប់​ការប្រកួត​ជំ​រុះ World Cup ២០២២ តំបន់​អាស៊ី និង​ជំ​រុះ​បាល់ទាត់​ជើងឯក​ទ្វីប​អាស៊ី ២០២៣ ខាងមុខនេះ​។

​​សហព័ន្ធ​កីឡាបាល់ទាត់​ថៃ​បាន​បញ្ជាក់​ថា កីឡាករ​ខ្សែ​ការពារ​វ័យ ៣១​ឆ្នាំ​រូប​នេះ​បាន​សំរេច​ចិត្ត​ខ្លួន​កាលពី​ថ្ងៃ​ពុធ តាមរយៈ​សារ​បង្ហោះ​លើ​បណ្ដាញ​សង្គម​របស់​ខ្លួន ដោយសារតែ​បញ្ហា​ធ្វើដំណើរ​ត្រលប់​មក​ទឹកដី​ជប៉ុន​វិញ​ ដែល​តម្រូវ​អោយធ្វើ​ច​ត្តា​ឡី​ស័ក ១៤​ថ្ងៃ​។ ​Theerathon បាន​ប្រកប​អាជីព​បាល់ទាត់​នៅ​ទឹកដី​ជប៉ុន​តាំងពី​ឆ្នាំ២០១៨ ជាមួយ​ក្លិប Vissel Kobe ក្នុង​កិច្ចសន្យាខ្ចី​ជើង មុនពេល​ផ្លាស់​ទៅកាន់ Yokohama F. Marinos នៅ​រដូវ​កាល​បន្ទាប់ និង​ជា​សមាជិក​របស់ Yokohama ដែល​ឈ្នះ​ជើងឯក​លី​គ​កំពូល​ជប៉ុន J-League ផងដែរ​។ ​Theerathon បានបង្ហាញ​ខ្លួន​អោយ​ក្រុម​ជំរើសជាតិ​ថៃ​សរុប ៦៤លើក​ធ្លាប់ជួយ​ក្រុម​ឡើង​វគ្គ ១៦ក្រុម​ចុងក្រោយ AFC Asian Cup ២០១៩ នៅ​អារ៉ាប់​រួម​។

​​ក្រុម​ថៃ​នឹងត្រូវ​ធ្វើដំណើរ​ទៅ​ទឹកដី​អារ៉ាប់​រួម​នៅ​ចុងខែ​នេះ ដើម្បី​ប្រកួត​បង្ហើយ​វគ្គ​ជំ​រុះ World Cup ២០២២ តំបន់​អាស៊ី​ក្នុង​ពូ​ល G ដោយ​នឹងត្រូវ​ជួប​ជាមួយ​ឥណ្ឌូនេស៊ី​នៅ​ថ្ងៃទី៣ ខែមិថុនា, ជួប​ម្ចាស់ផ្ទះ​អារ៉ាប់​រួម​ថ្ងៃទី៧ និង​ចុងក្រោយ​ជួបម៉ាឡេស៊ី​ថ្ងៃទី១៥ ខែមិថុនា​។ ​ថៃ​កំពុង​ឈរ​លេខ៣ ក្នុង​ពូ​ល G នេះ​មាន ៨ពិន្ទុ​តាម​ពីក្រោយ​ក្រុម​លើ​គេ​ក្នុង​ពូ​ល​វៀតណាម ៣ពិន្ទុ​៕

​អត្ថបទ​៖​នាង សុភា​វុ​ធ