នៅថ្ងៃចន្ទនេះ ក្រុមអ្នករៀបចំព្រឹត្តការណ៍កាយរិទ្ធិពិភពលោកកូរ៉េខាងត្បូង បានសន្យាធានាសុវត្ថិភាពរបស់អ្នកចូលរួម ស្របពេលក្តីបារម្ភកើនឡើងពីរលកកម្តៅ និងព្យុះទីហ្វុងខិតជិតមកដល់។

 រថយន្តក្រុងមានម៉ាស៊ីនត្រជាក់ ត្រូវបានផ្តល់ជូនដល់អ្នកត្រូវការសម្រាកពីកម្តៅ ស្របពេលដែលអ្នកចូលរួមខ្លះទៀត ទទួលបានដបទឹកត្រជាក់ពីរថយន្ត ឬអង្គុយនៅផ្លូវក្រោមដីមានប្រព័ន្ធបំភាយទឹកតាមរុក្ខវិថីរៀបចំព្រឹត្តការណ៍។ 

 ដោយឡែក ការប្រគុំតន្រ្តីរបស់ក្រុមតារាចម្រៀង K-popដែលពីមុនគ្រោងនឹងធ្វើឡើងនៅទីតាំងបោះជំរំកាលពីថ្ងៃអាទិត្យនោះ ត្រូវបានលើកពេលទៅថ្ងៃសុក្រសប្តាហ៍នេះវិញ ហើយនឹងធ្វើឡើងនៅក្នុងពហុកីឡដ្ឋានបាល់ទាត់ Jeonju World Cup ដែលស្ថិតនៅចម្ងាយប្រហែល ៥៣គ.មពីទីតាំងដើម។

 យោងតាមការព្យាករណ៍ឧតុនិយមចុងក្រោយ បានឲ្យដឹងថា ព្យុះទីហ្វុង Kanunកំពុងតែធ្វើដំណើរយឺតៗឆ្ពោះទៅកាន់កូរ៉េខាងត្បូង ហើយគេរំពឹងថា វានឹងបោកបក់ឆ្លងកាត់តំបន់ភាគខាងត្បូងប្រទេសនៅថ្ងៃព្រហស្បតិ៍ខាងមុខនេះ។ 

 ក្រុមអ្នករៀបចំព្រឹត្តការណ៍កាយារិទ្ធិពិភពលោក បានលម្អិតពីវិធានការទប់ទល់សម្រាប់ស្ថានភាពព្យុះទីហ្វុង ក្នុងនោះទីភ្នាក់ងារពាក់ព័ន្ធ និងជម្រកបណ្តោះអាសន្នជាង ៣៤០កន្លែង ត្រូវបានរៀបចំ។

 ដោយក្រុមកាយារិទ្ធិភាគច្រើនបានចាកចេញទៅវិញមុនអស់ ក្រុមអ្នករៀបចំព្រឹត្តការណ៍នេះ បានរងការរិះគន់យ៉ាងខ្លាំងពីឪពុកម្តាយ និងសាធារណជន សម្រាប់កង្វះខាតការត្រៀមខ្លួនសម្រាប់រលកកម្តៅដ៏ក្តៅខ្លាំង និងសុវត្ថិភាព។

 ទោះបីជាយ៉ាងណាក៏ដោយ លោក Kim Hyun-Sookគឺជារដ្ឋមន្រ្តីក្រសួងសមភាពយ៉េនឌ័រ និងគ្រួសារ និងជាសហប្រធានគណៈកម្មាធិការរៀបចំព្រឹត្តការណ៍កាយារិទ្ធិពិភពលោក និយាយថា បើទោះបីជាជួបការលំបាក បង្កឡើងដោយសារតែរលកកម្តៅក្តៅបំផុត និងព្យុះទីហ្វុងខិតជិតមកដល់ក៏ដោយ ពួកយើងនឹងប្រឹងប្រែងឲ្យអស់ពីសមត្ថភាព ដើម្បីធានការថា ព្រឹត្តការណ៍កាយារិទ្ធិពិភពលោក ត្រូវបានសន្និដ្ឋានប្រកបដោយសុវត្ថិភាព តាមរយៈការតាមដានស្ថានភាពនៅហ្នឹងកន្លែង និងលើកឡើងបញ្ហាណាមួយដែលកើតមាន៕