ក្រុមនគរបាលនិយាយកាលពីថ្ងៃអាទិត្យថា កងកម្លាំងសន្តិសុខ បានបាញ់សម្លាប់ជីវពល ៤នាក់ អំឡុងការប៉ះទង្គិចគ្នារយៈពេល ២៤ម៉ោងចុងក្រោយនេះ នៅស្រុក Rajouri តំបន់កាស្មៀ ប្រទេសឥណ្ឌា។

 ពួកគេបន្តថា ក្រោយទទួលបានរបាយការណ៍ចារកម្ម ប្រតិបត្តិការរុករកចម្រុះ ត្រូវបានធ្វើឡើងដោយកងទ័ពឥណ្ឌា និងនគរបាលរដ្ឋ Jammu-Kashmir នៅតំបន់ Budhal ហើយនៅពេលនោះ ក្រុមជីវពល ចាប់ផ្តើមបាញ់ប្រហារ អំឡុងប្រតិបត្តិការរុករក ក្រោយពីមនុស្សម្នាក់ក្នុងចំណោមពួកគេ ត្រូវបានសម្លាប់ពេលផ្ទុះអាវុធ ហើយក្រោយមកក្រុមភេរវករ ៣នាក់ទៀត ត្រូវបានសម្លាប់។

លោក Mukesh Singhគឺជាស្នងការនគរបាលប្រចាំរដ្ឋ Jammu និយាយថា កងកម្លាំងសន្តិសុខ មានជំនឿថា ក្រុមជីវពលទាំងនេះ មកពីប្រទេសប៉ាគីស្ថាន។

គួរឲ្យដឹងថា ទាហាន៣នាក់ ត្រូវបាសម្លាប់នៅស្រុក Kulgam អំឡុងការផ្ទុះអាវុធជាមួយក្រុមជីវពលកាលពីថ្ងៃសុក្រសប្តាហ៍មុន។

ការផ្ទុះអាវុធ បានកើតឡើងចំពេលខួប ៤ឆ្នាំនៃការដកចេញស្ថានការពិសេសរបស់តំបន់កាស្មៀ ។ កាលពីមុនរដ្ឋចាំមូ និងរដ្ឋកាស្មៀ ត្រូវបានគេដាក់ឈ្មោះថាជាដែនដីសហព័ន្ធ ប៉ុន្តែត្រូវបានដកចេញស្ថានការពិសេសនេះវិញ កាលពីឆ្នាំ ២០១៩។

កាស្មៀ ដែលជាតំបន់ភាគច្រើនជាជនមូស្លីមនោះ ស្ថិតនៅក្នុងជម្លោះអស់រយៈពេលជាច្រើនទសវត្សរ៍មកហើយ រវាងប្រទេសប្រដាប់អាវុធនុយក្លេអ៊ែរឥណ្ឌា និងប៉ាគីស្ថាន។ ប្រទេសជិតខាងទាំង ២ គ្រប់គ្រងផ្នែកខ្លះនៃតំបន់មួយនេះ ខណៈដែលប្រកាសសិទ្ធិគ្រប់គ្រងទាំងមូលថាជាដែនដីរបស់ពួកគេ៕