អូស្ត្រាលី៖ អាជ្ញាធរអូស្ត្រាលី បានឲ្យដឹង នៅថ្ងៃអង្គារ (ទី៨ ខែសីហា)នេះ ថា នគរបាលបានចាប់ខ្លួនបុរសចំនួន ១៩នាក់ពីបទចែកចាយខ្លឹមសាររំលោភបំពានលើកុមារតាមអ៊ិនធឺណិត ហើយបានជួយសង្គ្រោះកុមារ ១៣នាក់ កុំឲ្យរងគ្រោះថ្នាក់បន្ថែមទៀត បន្ទាប់ពីទទួលបានព័ត៌មានសម្ងាត់ពីការិយាល័យស៊ើបអង្កេតសហព័ន្ធ (FBI)។

ប្រតិបត្តិការស៊ើបអង្កេតដែលមានឈ្មោះថា Operation Bakis បានចាប់ផ្តើម នៅក្នុងប្រទេសអូស្ត្រាលី កាលពីឆ្នាំមុន បន្ទាប់ពីមានការសម្លាប់ភ្នាក់ងារ FBI ចំនួន ២នាក់ នៅរដ្ឋផ្លរីដា (Florida) ក្នុងឆ្នាំ២០២១ នៅពេលដែលកំពុងស៊ើបអង្កេតការរំលោភបំពានលើកុមារ នៅសហរដ្ឋអាមេរិក។

មេបញ្ជាការនគរបាលសហព័ន្ធអូស្ត្រាលី (AFP) លោកស្រី Helen Schneider ( ហេឡេន ស្នេដឺ) បាននិយាយក្នុងសន្និសីទសារព័ត៌មានថា FBI បន្ទាប់មក បានផ្តល់ព័ត៌មានដល់នគរបាលអូស្ត្រាលីអំពីសមាជិកនៃបណ្តាញក្រុមទំនាក់ទំនងស្គាល់គ្នាតាមអ៊ិនធឺណេត ក្នុងប្រទេសដែលត្រូវបានចោទប្រកាន់ថា បានចែករំលែកខ្លឹមសាររំលោភបំពានលើកុមារ តាមគេហរទំព័រទីផ្សារងងឹត (ខុសច្បាប់)។

បុរសទាំងនោះ ដែលមានអាយុចន្លោះពី ៣២ ទៅ ៨១ឆ្នាំ បានចែកចាយរូបភាព និងវីដេអូ ដែលមានខ្លឹមសាររំលោភបំពានលើកុមារ បានជជែកគ្នានៅលើកម្មវិធីផ្ញើសារ និងត្រូវបានចោទប្រកាន់ថា បានប្រើលេខកូដសម្ងាត់ ដើម្បីគេចពីការរកឃើញ។ លោកស្រី Schneider បានបន្ថែមថា ជនល្មើសជាជនជាតិអូស្ត្រាលីភាគច្រើន ត្រូវបានជួលឲ្យធ្វើការងារ ដែលទាមទារសមត្ថភាពកម្រិតខ្ពស់ ក្នុងការប្រើប្រាស់បច្ចេកទេស៕