ចិន ៖ ក្រសួងការបរទេសចិន នៅថ្ងៃអង្គារ (ទី៨ ខែសីហា) បានធ្វើការអំពាវនាវរបស់ខ្លួនជាថ្មីម្តងទៀតឲ្យប្រទេសហ្វីលីពីនអូសនាវាចម្បាំងដែលកឿង ឬចតទុកចោល ពោលគឺជានាវាសល់ពីសម័យសង្គ្រាមលោកលើកទី២ ដែលមានសភាពច្រែះចាប់ និងដែលត្រូវបានប្រើជាមូលដ្ឋាន ពីតំបន់ទឹករាក់ ដែលមានជម្លោះ បន្ទាប់ពីទីក្រុងម៉ានីល បានប្រាប់ទីក្រុងប៉េកាំងថា ខ្លួននឹងមិនបោះបង់ចោលតំបន់នោះទេ។

វិវាទជុំវិញកោះ Thomas Shoal ទី២ នៅសមុទ្រចិនខាងត្បូង បានកើតឡើងបន្ទាប់ពីក្រុងម៉ានីល បានចោទឆ្មាំល្បាតឆ្នេររបស់ប្រទេសចិនថា មានសកម្មភាពហួសហេតុ និងវាយលុក ប្រឆាំងនឹងនាវាហ្វីលីពីន។

ក្រសួងការបរទេសចិនបាននិយាយនៅក្នុងសេចក្តីថ្លែងការណ៍មួយថា៖ «ប្រទេសចិនជាថ្មីម្តងទៀត បានជំរុញឲ្យភាគីហ្វីលីពីនយកនាវាចម្បាំងចេញពីតំបន់កោះ Thomas Shoal ទី២ ជាបន្ទាន់ ហើយធ្វើឲ្យតំបន់នោះក្លាយទៅជាតំបន់ទំនេររបស់ខ្លួនដូចដើមវិញ»។

ក្រសួងបានបន្ថែមថា ប្រទេសចិនបានទាក់ទងជាមួយហ្វីលីពីនអំពីបញ្ហាកោះ Thomas Shoal ទី២ «ជាច្រើនដង» តាមរយៈបណ្តាញការទូត ប៉ុន្តែសុច្ឆន្ទៈ និងភាពស្មោះត្រង់របស់ខ្លួន ត្រូវបាន«ធ្វើមិនដឹងមិនឮ»។ ក្រសួងការបរទេស បានបញ្ជាក់ថា ប្រទេសចិនមានឆន្ទៈក្នុងការដោះស្រាយបញ្ហាដែនសមុទ្រ ការពិភាក្សា និងការពិគ្រោះយោបល់។

ចំណែកលោក Jonathan Malaya ជំនួយការប្រធានក្រុមប្រឹក្សាសន្តិសុខជាតិហ្វីលីពីន បានលើកឡើងម្តងហើយម្តងទៀតនូវការអត្ថាធិប្បាយដែលលោកបានធ្វើ កាលពីថ្ងៃចន្ទ (ទី៧ ខែសីហា) ដោយនិយាយថា «ហ្វីលីពីននឹងមិនបោះបង់ចោលប៉ុស្តិ៍របស់យើងនៅតំបន់កោះ Ayungin Shoal» នោះទេ៕