រដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន ( Antony Blinken) បានថ្លែងនៅក្នុងបទសម្ភាសន៍ជាមួយវិទ្យុបារាំង( RFI )ថា អាជ្ញាធរអាមេរិកជឿជាក់ថា ការផ្តល់គ្រាប់ធញ្ញជាតិដោយមិនគិតថ្លៃរបស់ រុស្ស៊ីទៅកាន់បណ្តាប្រទេសនៅអាហ្វ្រិកមួយចំនួន មិនបានបញ្ឈប់ការកើនឡើងនៃការចំណាយខ្ពស់ ឬផ្លាស់ប្តូរស្ថានភាពទីផ្សារម្ហូបអាហារនោះទេ ដែលអត្ថបទនោះ ត្រូវបានបោះពុម្ពផ្សាយដោយក្រសួងការបរទេសសហរដ្ឋអាមេរិក។

លោកបាននិយាយថា៖«ប្រទេសរុស្ស៊ី បានបង្ហាញយ៉ាងច្បាស់នូវគំនិតនៃការនាំចេញគ្រាប់ធញ្ញជាតិចំនួន ៥០.០០០ តោនទៅកាន់ប្រទេសចំនួន ៥ ឬ៦។ ក្រោមកិច្ចព្រមព្រៀងដែលរុស្ស៊ីបានហែកចេញនេះ យើងបាននាំចេញអង្ករចំនួន ២០លានតោនទៅកាន់ប្រទេសកំពុងអភិវឌ្ឍន៍។

ដូច្នេះ ចំនួន៥០.000 តោនដែលស្នើឡើងដោយប្រទេសរុស្ស៊ី ធៀបនឹង២០លានតោន ដែលត្រូវបាននាំចេញក្រោមកិច្ចព្រមព្រៀងនេះ មិនមានការប្រៀបធៀបទេ។ អ្វីដែលរុស្ស៊ីកំពុងស្នើ គឺជាចំនួនតិចតួច។ វាមិនអាចដោះស្រាយបញ្ហានោះទេ។ វានឹងមិនបញ្ឈប់ការកើនឡើងនៃតម្លៃនោះទេ។ វានឹងមិនផ្លាស់ប្តូរការពិតដែលរាប់លានតោននៃគ្រាប់ធញ្ញជាតិ ត្រូវបានគេយកចេញពីទីផ្សារ ហើយមិនមានសម្រាប់អ្នក ដែលកំពុងត្រូវការទេ ជាពិសេសនៅក្នុងប្រទេសកំពុងអភិវឌ្ឍន៍¬»។

កញ្ចប់ឯកសារដែលត្រូវបានរៀបចំសម្រាប់ដោះស្រាយបញ្ហាការផ្គត់ផ្គង់ស្បៀងអាហារ និងជីនៅលើទីផ្សារពិភពលោក ត្រូវបានចុះហត្ថលេខា នៅថ្ងៃទី២២ ខែកក្កដា ឆ្នាំ២០២២ នៅទីក្រុងអ៊ីស្តង់ប៊ុល ប្រទេសទួរគី ហើយបានបន្តជាច្រើនដង បន្ទាប់ពីនោះ មុនពេលផុតកំណត់នៅថ្ងៃទី១៧ ខែកក្កដា។ ប្រទេសរុស្ស៊ី បានបដិសេធមិនបន្តវាម្តងទៀត ដោយសារតែផ្នែកនៃកិច្ចព្រមព្រៀង ដែលរំពឹងថា នឹងដកចេញនូវឧបសគ្គសម្រាប់ការនាំចេញកសិផលរបស់រុស្ស៊ី មិនដែលត្រូវបានអនុវត្តនោះទេ។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្តេជ្ញាថា ប្រទេសរុស្ស៊ី នឹងបន្តកិច្ចព្រមព្រៀងឡើងវិញ នៅពេលដែលការទាមទាររបស់ខ្លួន ត្រូវបានបំពេញ។