យោងតាមភស្តុតាងបច្ចេកទេស ដែលពិនិត្យឡើងវិញដោយសារព័ត៌មានរ៉យទ័រ និងការវិភាគដោយក្រុមស្រាវជ្រាវសន្តិសុខ បានឲ្យដឹងថា ក្រុមសម្រាំងមួយនៃពួកចោរព័ត៌មានវិទ្យាកូរ៉េខាងជើង បានលួចជ្រៀតចូលជាសម្ងាត់ក្នុងបណ្តាញកុំព្យូទ័រ នៅក្រុមហ៊ុនផលិតមីស៊ីលធំមួយរបស់រុស្ស៊ីមានរយៈពេលយ៉ាងហោចណាស់៥ខែ កាលពីឆ្នាំមុន។

សារព័ត៌មានរ៉យទ័រ បានរាយការណ៍ថាក្រុមចារកម្មបណ្តាញប្រព័ន្ធបច្ចេកវិទ្យាអ៊ីនធឺណិត ScarCruft និង Lazarus ដែលមានទំនាក់ទំនងជាមួយរដ្ឋាភិបាលកូរ៉េខាងជើង បានតម្លើងជាសម្ងាត់នូវរន្ធខ្មៅឌីជីថលដែលមើលមិនឃើញនៅក្នុងប្រព័ន្ធរបស់សមាគមផលិតផ្នែកវិទ្យាសាស្ត្រម៉ាស៊ីនណូស្ត្រយយ៉េនីយ៉ា(Mashinostroyeniya) មានមូលដ្ឋាននៅក្នុងតំបន់ Reutov ជិតទីក្រុងមូស្គូ។ ប្រព័ន្ធផ្សពព្វផ្សាយពុំអាចកំណត់ថាតើទិន្នន័យណាមួយត្រូវបានទទួលនោះទេអំឡុងការចូលលួច និងតើព័ត៌មានប្រភេទណាដែលអាចត្រូវបានពិនិត្យ។

រយៈពេលជាច្រើនខែបន្ទាប់ពីការចូលលួចទិន្នន័យ ទីក្រុងព្យុងយ៉ាងបានប្រកាសពីភាពរីកចម្រើនមួយចំនួនក្នុងកម្មវិធីមីស៊ីលបាលីស្ទីករបស់ខ្លួន ប៉ុន្តែវាមិនច្បាស់នោះទេថាតើបញ្ហានេះជាប់ទាក់ទងទៅនឹងការចូលលួចទិន្នន័យឬយ៉ាងណា។ វាត្រូវបានគេនិយាយថា ចោរព័ត៌មានវិទ្យាបានលួចចូលក្នុងបណ្តាញ របស់សមាគមផលិតផ្នែកវិទ្យាសាស្ត្រម៉ាស៊ីនណូស្ត្រយយ៉េនីយ៉ា(Mashinostroyeniya) ពីចុងឆ្នាំ២០២១ ដល់ខែឧសភា ឆ្នាំ២០២២។

ព័ត៌មានស្តីពីការចូលលួចទិន្នន័យ កើតឡើងភ្លាមៗបន្ទាប់ពីរដ្ឋមន្ត្រីក្រសួងការពារជាតិរុស្ស៊ីលោក Sergei Shoigu បានធ្វើទស្សនកិច្ចទៅកាន់ទីក្រុងព្យុងយ៉ាងដើម្បីចូលរួមខួបសង្គ្រាមកូរ៉េលើកទី៧០ ជាដំណើរទស្សនកិច្ចលើកដំបូងធ្វើឡើងដោយរដ្ឋមន្ត្រីការពារជាតិរុស្ស៊ីទៅកាន់កូរ៉េខាងជើង ចាប់តាំងពីការដួលរលំសហភាពសូវៀតក្នុងឆ្នំ១៩៩១។