ចៅក្រមបណ្ដឹងឧទ្ធរណ៍របស់អង្គការសហប្រជាជាតិ កាលពីថ្ងៃចន្ទ (ទី៧ ខែសីហា) បានបញ្ជាឲ្យការកាត់ទោសឧក្រិដ្ឋកម្មសង្គ្រាម សម្រាប់ជនសង្ស័យឧក្រិដ្ឋកម្មប្រល័យពូជសាសន៍ នៅប្រទេសរ្វ៉ាន់ដា លោក Felicien Kabuga ដែលមានវ័យចំណាស់ ត្រូវបានផ្អាកដោយគ្មានកាលកំណត់ ដោយសារគាត់មានជំងឺវង្វេង ដោយបដិសេធគម្រោង ដើម្បីឲ្យមាននីតិវិធីកាត់បន្ថយទោសជម្រើសផ្សេងទៀត។

ក្រុមចៅក្រមដែលជាផ្នែកមួយនៃតុលាការ ដែលបានជំនួសតុលាការឧក្រិដ្ឋកម្មសង្រ្គាមរ្វ៉ាន់ដានោះ ក៏បានបញ្ជាឲ្យអង្គជំនុំជម្រះថ្នាក់ក្រោមវាយតម្លៃយ៉ាងឆាប់រហ័ស ក្រោមកាលៈទេសៈអ្វីដែលលោក Kabuga អាចត្រូវបានដោះលែង។ មេធាវីរបស់ជនជាប់ចោទ នៅមុននេះ បាននិយាយថា កូនក្តីរបស់លោកគួរត្រូវបានដោះលែងឲ្យមានសេរីភាព។

អតីតអ្នកជំនួញ និងម្ចាស់ស្ថានីយវិទ្យុ លោក Kabuga គឺជាជនសង្ស័យចុងក្រោយមួយរូប ដែលតុលាការឧក្រិដ្ឋកម្ម ដំណើរការក្ដីពីបទប្រល័យពូជសាសន៍ ក្នុងឆ្នាំ១៩៩៤ នៅប្រទេសរ្វាន់ដា នៅពេលដែលក្រុមជ្រុលនិយមភាគច្រើនហ៊ូទូ (Hutu) ដែលកំពុងកាន់អំណាច បានសម្លាប់ជនជាតិភាគតិចទូតស៊ីស (Tutsis) និងហ៊ូទូ ចំនួនជាង ៨០០.០០០នាក់ ក្នុងរយៈពេល ១០០ថ្ងៃ។

លោក Kabuga មានវ័យជាង៨០ឆ្នាំ ទោះបីជាថ្ងៃខែឆ្នាំកំណើតច្បាស់លាស់របស់លោក ត្រូវបានជំទាស់ក៏ដោយ។ លោកត្រូវបានចាប់ខ្លួននៅប្រទេសបារាំង ក្នុងឆ្នាំ២០២០ បន្ទាប់ពីរត់គេចខ្លួនអស់រយៈពេលជាង ២០ឆ្នាំ។ កាលពីខែមិថុនា ចៅក្រមនៅតុលាការឧក្រិដ្ឋកម្មសង្គ្រាមរបស់អង្គការសហប្រជាជាតិ បានសម្រេចថា លោក Kabuga មិនស័ក្តិសមឡើងសវនាការនោះទេប៉ុន្តែបាននិយាយថា នីតិវិធីផ្សេងទៀត គួរតែកើតមានឡើង។

រដ្ឋអាជ្ញាបានជំទាស់ថា ការបញ្ឈប់ការកាត់ក្តី នឹងមានភាពអយុត្តិធម៌ ចំពោះជនរងគ្រោះ ហើយបាននិយាយថា សកម្មភាពផ្ទាល់របស់លោក Kabuga ធ្វើឲ្យលោកស្ថិតក្នុងការប្រឈមនឹងការកាត់ក្តី នៅអាយុច្រើនជាមួយនឹងការថយចុះសមត្ថភាពរាងកាយ៕