ក្រុមបាល់ទាត់នារីបារាំងបានបញ្ចប់ក្តីសង្ឃឹមរបស់ម៉ារ៉ុក ក៏ដូច​ជា​ក្តី​សង្ឃឹម​របស់​ក្រុម​មក​ពី​អាហ្វ្រិក​ ដើម្បី​ឡើង​វគ្គ ៨ ក្រុមចុងក្រោយបាល់ទាត់នារីជើងឯកពិភពលោក។

កីឡាការិនី Kadidiatou Diani និង Kenza Dali រកបានម្នាក់មួយគ្រាប់នៅវគ្គទី ១ ខណៈ Eugenie Le Sommer រកបានពីរគ្រាប់ម្នាក់ឯងឱ្យអតីតក្រុមលេខ ៤ World Cup ឆ្នាំ ២០១១ បារាំង​យកឈ្នះដោយលទ្ធផល ៤-០ ឡើងវគ្គ ៨ ក្រុមចុងក្រោយ។

បារាំង​នឹងបន្តទៅជួបជាមួយម្ចាស់ផ្ទះអូស្ត្រាលី នៅទីក្រុង Brisbane ថ្ងៃសៅរ៍នេះ។

ចំណែក​ឯក្រុមនារីម៉ារ៉ុក សង្ឃឹមថានឹងក្លាយជាក្រុមនារីអាហ្វ្រិកដំបូងដែលឈ្នះការប្រកួតនៅវគ្គ Knockout តែអ្វីៗប្រែក្រឡាប់ចាក់បន្ទាប់ពីគ្រាប់នាំមុខ ២ គ្រាប់របស់បារាំងលឿនៗ។

ងាក​មកការប្រកួតមួយគូទៀត កូឡុំប៊ីក៏បានបន្តដំណើរទៅវគ្គ ៨ ក្រុមចុង​ក្រោយ​ដែរ​ក្រោយ​យក​ឈ្នះ​ក្រុម​នារី សាម៉ាអ៊ិកតានតឹង ១-០។

កីឡាការិនី Cataline Usme គឺជាអ្នកស៊ុតបញ្ចូលទីគ្រាប់ជ័យជំនះយ៉ាងអស្ចារ្យនៅនាទីទី ៥១។

មួយ​គ្រាប់នេះ គឺជាគ្រាប់ដំបូងដែលសាម៉ាអ៊ីករបូតគ្រាប់បាល់នៅ World Cup ឆ្នាំនេះ តែពួក​គេ​ក៏​មិន​អាច​រកបានគ្រាប់តាមស្មើដែរ។

លទ្ធផលនេះធ្វើឱ្យក្រុមនារីកូឡុំប៊ីឡើងវគ្គ ៨ ក្រុមចុងក្រោយ World Cup ជាលើក​ដំបូង​ដោយ​នឹង​ត្រូវ​ជួប​ជាមួយអង់គ្លេសនៅទីក្រុងស៊ីដនីប្រទេសអូស្រ្តាលីថ្ងៃសៅរ៍នេះ៕ អត្ថបទ៖នាង សុភាវុធ