អាមេរិក ៖ ប្រធានាធិបតីអាមេរិកលោក Joe Biden បាននិយាយកាលពីថ្ងៃអង្គារ (ទី៨ ខែសីហា) ថា លោកនឹងធ្វើដំណើរទៅកាន់ប្រទេសវៀតណាម «ក្នុងពេលដ៏ខ្លី» ខាងមុខនេះ ដោយសារតែប្រទេសអាស៊ីមួយនេះចង់លើកកម្ពស់ទំនាក់ទំនងជាមួយសហរដ្ឋអាមេរិក និងក្លាយជាដៃគូដ៏សំខាន់។ 

ការលើកឡើងរបស់លោក Biden នេះ កើតមានឡើង អំឡុងពេលថ្លែងក្នុងកម្មវិធីរៃអង្គាសប្រាក់នយោបាយ ក្នុងរដ្ឋញូវម៉ិកស៊ិកូ (New Mexico) តែនៅពេលសួរអំពីការប្រកាសរបស់លោកប្រធានាធិបតីនេះ អ្នកនាំពាក្យសេតវិមាន បានឆ្លើយថា៖ «មិនមានអ្វីត្រូវចែករំលែកឲ្យដឹងទៀតនោះទេ នាពេលនេះ»។

គួរបញ្ជាក់ដែរថា នៅក្នុងកិច្ចប្រជុំ កាលពីខែមេសា នាយករដ្ឋមន្ត្រីវៀតណាម លោក Pham Minh Chinh និងរដ្ឋមន្ត្រីការបរទេសអាមេរិក លោក Antony Blinken បានសម្តែងនូវបំណងពីការធ្វើឲ្យទំនាក់ទំនងកាន់តែស៊ីជម្រៅ ខណៈដែលទីក្រុងវ៉ាស៊ីនតោនស្វែងរកការពង្រឹងទំនាក់ទំនងជាមួយដៃគូ ក្នុងតំបន់អាស៊ី ដើម្បីទប់ទល់នឹងប្រទេសចិន ដែលមានឥទ្ធិពលកាន់តែខ្លាំងឡើងៗ ដោយលោក Blinken បានបង្ហាញពីក្តីសង្ឃឹមនាពេលនោះថា វាអាចកើតឡើង «នៅក្នុងប៉ុន្មានសប្តាហ៍និងប៉ុន្មានខែខាងមុខ»។

លើពីនេះទៀត កាលពីថ្ងៃទី២៨ ខែកក្កដា លោក Biden បាននិយាយទៅកាន់កម្មវិធីរៃអង្គាសប្រាក់ នៅទីរដ្ឋ Maine ថា រូបលោកបានទទួលការហៅទូរស័ព្ទពីប្រមុខដឹកនាំនៃប្រទេសវៀតណាម ដែលចង់ជួបជាមួយរូបលោកយ៉ាងខ្លាំង នៅពេលដែលលោកទៅចូលរួមកិច្ចប្រជុំក្រុមប្រទេសទាំង២០ (G20) ដោយការនិយាយនេះ គឺសំដៅដល់ផែនការរបស់លោក ក្នុងការធ្វើដំណើរទៅកាន់ប្រទេសឥណ្ឌា សម្រាប់កិច្ចប្រជុំកំពូលនៃក្រុមប្រទេសនេះ ដែលគ្រោងនឹងរៀបចំឡើងនៅទីក្រុងញូវដេលី (New Delhi) នៅថ្ងៃទី ៩-១០ ខែកញ្ញា។

តែទោះជាយ៉ាងណាក៏ដោយ ក្រុមមន្ត្រីមិនបាននិយាយអំពីអ្វីដែលអាចពាក់ព័ន្ធដល់ទំនាក់ទំនងជិតស្និទ្ធរវាងប្រទេសទាំង២នោះទេ ប៉ុន្តែអ្នកជំនាញនិយាយថា ទំនាក់ទំនងនោះអាចរួមបញ្ចូលទាំងការបង្កើនកិច្ចសហប្រតិបត្តិការយោធា និងការផ្គត់ផ្គង់អាវុធរបស់សហរដ្ឋអាមេរិកផងដែរ៕