ក្រុមមេដឹកនាំប្រទេសតំបន់ជប់ភ្លៀងអាម៉ាហ្សូន បានបង្ហាញរូបភាពសាមគ្គីភាព ពេលដែលពួកគេជួបគ្នាដើម្បីបញ្ចប់ការកាប់បំផ្លាញព្រៃឈើ ប៉ុន្តែពួកគេពុំអាចព្រមព្រៀងលើឱសានវាទ ដើម្បីបញ្ចប់ការកាប់បំផ្លាញព្រៃឈើនោះឡើយ ពេលដែលកិច្ចប្រជុំកំពូលរបស់ពួកគេ បានបញ្ចប់កាលពីថ្ងៃអង្គារ។

 កិច្ចប្រជុំកំពូលនៅទីក្រុង Belemមានការជួបជុំគ្នារបស់ក្រុមមន្រ្តីមកពីប្រទេសប្រេស៊ីល កូឡុំប៊ី វេណេហ្ស៊ុយអេឡា និងប្រទេសជាច្រើនទៀត។

 ប្រទេសទាំងអស់នេះ ដែលបង្កើតបានជាអង្គការសន្ធិសញ្ញាកិច្ចសហប្រតិបត្តិកាតំបន់ជប់ភ្លៀងរអាម៉ាហ្សូន ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងបញ្ឈប់ការកាប់បំផ្លាញព្រៃឈើនៅឆ្នាំ ២០៣០ គឺជាគោលដៅមួយដែលប្រេស៊ីល ចង់សម្រេចឲ្យបាន។

 តែផ្ទុយទៅវិញ ប្រទេសសមាជិកអង្គការមួយនេះ នៅតែបន្តគោលដៅកាប់បំផ្លាញព្រៃឈើរបស់ពួកគេដដែល។

 ប្រភពព័ត៌មានពីរដ្ឋាភិបាលប្រេស៊ីល បាននិយាយប្រាប់ទីភ្នាក់ងារព័ត៌មានរ៉យទ័រថា ប្រទេសបូលីវី ប្រឆាំងនឹងបញ្ហាមួយនេះ ស្របពេលដែលភាពតានតឹងកើតមានផងដែរលើបញ្ហាខួងប្រេង។

 ប្រធានាធិបតីកូឡុំប៊ី បានជំទាស់ទៅនឹងការផលិតប្រេងថ្មីនៅក្នុងតំបន់ព្រៃជប់ភ្លៀងអាម៉ាហ្សូន។

 ប៉ុន្តែរដ្ឋមន្រ្តីថាមពលប្រេស៊ីលនិយាយថា ពួកគេចង់រុករកប្រេងថ្មីដ៏ច្រើននៅក្បែរសមុទ្រជិតមាត់ទន្លេអាម៉ាហ្សូន គឺជាអ្វីដែលលោកនិយាយថា គឺជាតំបន់ចុងក្រោយមានប្រេង និងឧស្ម័ន មុនពេលឈានដល់ការផ្លាស់ប្តូរថាមពលបន្តិចម្តងៗ។

 ទោះបីជាយ៉ាងណាក៏ដោយ អំឡុងពេលថ្លែងទៅកាន់សារព័ត៌មាន រដ្ឋមន្រ្តីការបរទេសប្រេស៊ីលលោក Mauro Veiraបានធ្វើការច្រានចោលការខ្វែងគំនិតគ្នារវាងប្រទេសកូឡុំប៊ី និងប្រទេសសមាជិកផ្សេងទៀត។

 លោកនិយាយថា ពួកយើងគ្មានគោលជំហរខ្វែងគំនិតគ្នានោះទេ ។ គោលជំហរគឺស្របគ្នា ហើយប្រទេសនិមួយៗ ត្រូវដើរតាមជំហានដែលពួកគេមាន៕