ក្រុមហ៊ុនអាកាសចរណ៍ជាច្រើន បានលុបចោលជើងហោះហើរជាច្រើនរយជើង ហើយអាជ្ញាធរបានចេញការព្រមាន នៅថ្ងៃពុធ (ទី៩ ខែសីហា) នេះ ខណៈដែលព្យុះត្រូពិច Khanun បានបក់បោកពីឆ្នេរសមុទ្រភាគខាងត្បូងរបស់ប្រទេសជប៉ុនឆ្ពោះទៅកាន់ប្រទេសកូរ៉េខាងត្បូង។

ព្យុះ ដែលត្រូវបានទម្លាក់កម្រិតពីព្យុះទីហ្វុង បានធ្វើឲ្យកូរ៉េខាងត្បូង ចាប់ផ្តើមជម្លៀសមនុស្សរួចហើយរាប់ម៉ឺននាក់ ដែលបោះជំរំនៅឯព្រឹត្តិការណ៍កាយរិទ្ធិ៍ពិភពលោក (World Scout Jamboree) ដែលមុននេះ ត្រូវបានវាយប្រហារដោយរលកកម្ដៅ។

នៅថ្ងៃពុធនេះ លំនៅឋានប្រហែល ១៦.០០០ខ្នង គ្មានអគ្គិសនីប្រើប្រាស់ ខណៈភ្លៀងធ្លាក់ខ្លាំង បានវាយប្រហារភាគខាងត្បូងកោះ Kyushu របស់ប្រទេសជប៉ុន។ ទីភ្នាក់ងារឧតុនិយមជប៉ុន បានព្រមានពីភ្លៀងធ្លាក់ខ្លាំង និងការឡើងពីហានិភ័យនៃបំណាក់ល្បាប់ភក់ និងទឹកជំនន់ដែលគំរាមកំហែងដល់អាយុជីវិត នៅតំបន់ Kagoshima របស់កោះនេះ។

អ្នកនាំពាក្យម្នាក់ បានប្រាប់សារព័ត៌មាន AFP ថា ក្រុមហ៊ុនអាកាសចរណ៍ Japan Airlines នៅថ្ងៃពុធនេះ បានលុបចោលជើងហោះហើរចំនួន ២៥២ជើង ដែលប៉ះពាល់ដល់អ្នកដំណើរប្រហែល ២៥.០០០នាក់។ ចំណែកស្ត្រីនាំពាក្យរបស់ក្រុមហ៊ុនអាកាសចរណ៍ All Nippon Airways បាននិយាយថា ជើងហោះហើរចំនួន ៩៦ជើង ត្រូវបានលុបចោល ដោយប៉ះពាល់ដល់មនុស្សជាង ១០.០០០នាក់។

នៅប្រទេសកូរ៉េខាងត្បូង ជាទីដែលគេរំពឹងថា ព្យុះ Khanun នឹងបក់បោកមកដល់ដីគោក នៅថ្ងៃព្រហស្បតិ៍ (ទី១០ ខែសីហា) នោះ ជើងហោះហើរជិត ៨០ជើង នៅអាកាសយានដ្ឋានចំនួន ១០ និងសេវាសាឡាងរាប់សិប ត្រូវបានផ្អាក ហើយក្រសួងមហាផ្ទៃរបស់ប្រទេសនេះ បាននិយាយថា ទីក្រុងសេអ៊ូល បានបង្កើនកម្រិតប្រកាសអាសន្នដល់កម្រិតខ្ពស់បំផុត ដោយព្យុះទីហ្វុង ត្រូវបានគេរំពឹងថា នឹងមានផលប៉ះពាល់ដោយផ្ទាល់លើប្រទេសទាំងមូល គិតចាប់ពីថ្ងៃពុធ ដល់ថ្ងៃសុក្រ៕