ថ្វីដ្បិតអតិផរណាបានធ្លាក់ចុះ នៅប្រទេសជាច្រើនក៏ដោយ ក៏តម្លៃគ្រឿងទេសដែលឡើងថ្លៃ នៅតែជាបញ្ហាសកល ហើយក៏ជាបញ្ហាមួយដែលគ្មានការពន្យល់ច្បាស់លាស់ នៅពីក្រោយការឡើងថ្លៃនេះ។

ជុំវិញបញ្ហានេះ សេដ្ឋវិទូ និងធនាគារកណ្តាល បានលើកឡើងពីការរួមបញ្ចូលគ្នានៃមូលហេតុ ដែលនាំឲ្យថ្លៃអាហារឡើងខ្ពស់នៅទូទាំងពិភពលោក ដោយក្នុងនោះរួមទាំងប្រតិបត្តិការយោធារបស់រុស្ស៊ីនៅអ៊ុយក្រែន ដែលបណ្តាលឲ្យតម្លៃជីអន្តរជាតិ និងតម្លៃគ្រាប់ធញ្ញជាតិឡើងខ្ពស់ហួសពីការស្មាន។ មូលនិធិរូបិយវត្ថុអន្តរជាតិ បានប៉ាន់ប្រមាណថា ការដកខ្លួនថ្មីៗនេះរបស់រុស្ស៊ីពីកិច្ចព្រមព្រៀងគ្រាប់ធញ្ញជាតិសមុទ្រខ្មៅ អាចបន្តជំរុញឲ្យតម្លៃគ្រាប់ធញ្ញជាតិឡើងខ្ពស់ដល់ទៅ ១៥ភាគរយ។

ជាមួយគ្នានេះដែរ ការបន្តមានករណីនៃការរំខានដល់ការនាំចេញអន្តរជាតិ ការដាក់ទណ្ឌកម្ម និងឧបសគ្គដល់ខ្សែចង្វាក់ផ្គត់ផ្គង់ ក៏បាននាំឲ្យតម្លៃទំនិញប្រើប្រាស់អន្តរជាតិឡើងថ្លៃកាន់តែខ្ពស់ឡើងៗផងដែរ។

លើសពីនេះទៀត ឥទ្ធិពលនៃអាកាសធាតុដ៏អាក្រក់ ដូចជារដូវមូសុងដ៏ធ្ងន់ធ្ងរ នៅប្រទេសឥណ្ឌា ដែលធ្វើឲ្យការប្រមូលផលស្រូវធ្លាក់ចុះ និងជំរុញឲ្យតម្លៃឡើងថ្លៃ គឺជាហេតុផលមួយទៀត ដែលអ្នកជំនាញចង្អុលបង្ហាញសម្រាប់តម្លៃគ្រឿងទេសឡើងខ្ពស់ ស្របពេលការរាតត្បាតនៃជំងឺផ្តាសាយបក្សី ក្នុងខែកុម្ភៈ ឆ្នាំ២០២២ បានធ្វើឲ្យតម្លៃស៊ុត នៅសហរដ្ឋអាមេរិកឡើងយ៉ាងខ្លាំង ដែលចាប់តាំងពីពេលនោះមក ក៏មានធ្លាក់ចុះខ្លះ។

យ៉ាងណាក្ដី ធនាគារកណ្តាល និងសេដ្ឋវិទូ បដិសេធគំនិតដែលថា «ភាពលោភលន់ឆ្លៀតជំរុញឲ្យមានអតិផរណា ឬការដំឡើងតម្លៃសាជីវកម្ម ដែលទាញយកប្រយោជន៍ពីស្ថានភាពសេដ្ឋកិច្ច ដើម្បីបង្កើនប្រាក់ចំណេញ គឺជាបាតុភូតមួយដែលប៉ះពាល់ដល់តម្លៃចំណីអាហារនេះ៕