អ៊ុយក្រែន៖ ប្រទេសអ៊ុយក្រែន បានប្រកាសថា ខ្លួននឹងបើកច្រករបៀងមនុស្សធម៌ នៅក្នុងសមុទ្រខ្មៅ ដើម្បីបញ្ចេញនាវាដឹកទំនិញដែលជាប់នៅក្នុងកំពង់ផែរបស់ខ្លួន ចាប់តាំងពីការផ្ទុះសង្រ្គាមដែលជាការសាកល្បងថ្មីនៃការបិទផ្លូវរបស់រុស្ស៊ី ចាប់តាំងពីទីក្រុងមូស្គូ បានបោះបង់ចោលកិច្ចព្រមព្រៀង កាលពីខែមុន ដើម្បីអនុញ្ញាតឲ្យទីក្រុងគីវនាំចេញគ្រាប់ធញ្ញជាតិពីកំពង់ផែសមុទ្ររបស់ខ្លួន។

យ៉ាងហោចណាស់ពីដំបូង ច្រករបៀងដែលត្រូវបានប្រកាសកាលពីថ្ងៃព្រហស្បតិ៍ នឹងអនុវត្តចំពោះនាវាដូចជានាវាដឹកកុងតេន័រ ដែលបានជាប់គាំងនៅក្នុងកំពង់ផែអ៊ុយក្រែន ចាប់តាំងពីការឈ្លានពានខែកុម្ភៈឆ្នាំ២០២២ដោយប្រទេសរុស្ស៊ី ហើយមិនត្រូវបានគ្របដណ្តប់ដោយកិច្ចព្រមព្រៀងដែលបើកច្រកកំពង់ផែសម្រាប់ការដឹកជញ្ជូនគ្រាប់ធញ្ញជាតិទេ កាលពីឆ្នាំមុន។

ប៉ុន្តែវាអាចជាការសាកល្បងដ៏សំខាន់នៃសមត្ថភាពរបស់អ៊ុយក្រែនក្នុងការបើកផ្លូវសមុទ្រឡើងវិញ នៅពេលដែលរុស្ស៊ីកំពុងព្យាយាមដាក់ការបិទផ្លូវមិនឲ្យចេញចូលជាថ្មី ដោយបានបោះបង់ចោលកិច្ចព្រមព្រៀងគ្រាប់ធញ្ញជាតិ កាលពីខែមុន។ ប្រភពនៃការដឹកជញ្ជូន និងធានារ៉ាប់រង បានបង្ហាញពីការព្រួយបារម្ភអំពីសុវត្ថិភាព។

សារព័ត៌មានក្នុងស្រុក The Kyiv Independent បានរាយការណ៍ថា កងទ័ពជើងទឹកអ៊ុយក្រែន បានព្រមានថា ការគំរាមកំហែងផ្នែកយោធាពីប្រទេសរុស្ស៊ី ក៏ដូចជាគ្រាប់មីនសមុទ្រ នៅតែមាននៅតាមបណ្តោយផ្លូវដឹកជញ្ជូនទាំងអស់នោះ៕