បារាំង ៖ ក្រុមបាតុករបានចេញធ្វើបាតុកម្មទៅកាន់មូលដ្ឋានយោធាបារាំងក្នុងរដ្ឋធានី Niamey របស់ប្រទេស នីហ្សេ កាលពីថ្ងៃសុក្រ ជាកន្លែងដែលអ្នកគាំទ្ររដ្ឋប្រហាររាប់ពាន់នាក់បានប្រមូលផ្តុំគ្នាសម្រាប់បាតុកម្មមួយ ខណៈបណ្តាមេដឹកនាំប្រចាំតំបន់កំពុងពិចារណាលើអន្តរាគមន៍យោធាដើម្បីស្ដារការគ្រប់គ្រងបែប ស៊ីវិលឡើងវិញ។

ចាប់តាំងពីការបណ្តេញចេញប្រធានាធិបតីជាប់ឆ្នោតលោក Mohamed Bazoum ពីអំណាចដោយយោធាកាលពីថ្ងៃទី ២៦ ខែកក្កដា ពលរដ្ឋនីហ្សេ ជាច្រើននាក់បានចូលរួមក្នុងការប្រមូលផ្តុំគ្នារៀបចំដោយរបបយោធា ដើម្បីបង្ហាញពីការគាំទ្រដល់ឧត្តមសេនីយជាច្រើនរូប រិះគន់ប្រទេសមហាអំណាចលោកខាងលិច និងសរសើរប្រទេសរុស្ស៊ីដែលកំពុងប្រជែងឥទ្ធិពលជាមួយប្រទេសលោកខាងលិចនៅក្នុងតំបន់។

កំហឹងដ៏ខ្លាំងក្លា គឺសំដៅទៅលើអតីតមហាអំណាចអាណានិគមបារាំង ដែលកងកម្លាំងរបស់ពួកគេត្រូវបានបណ្តេញចេញពីប្រទេសម៉ាលី និងបួគីណាហ្វាសូ បន្ទាប់ពីរដ្ឋប្រហារនៅទីនោះ ហើយមានវត្តមានរបស់ពួកគេនៅក្នុងប្រទេសនីហ្សេ ដែលកំពុងស្ថិតនៅក្រោមការគំរាមកំហែង។

សហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) បានបញ្ជាឱ្យប្រមូលកងកម្លាំងត្រៀមប្រចាំការ កាលពីថ្ងៃព្រហស្បតិ៍ រយៈពេលពីរសប្តាហ៍បន្ទាប់ពីឧត្តមសេនីយ៍បានបណ្តេញប្រធានាធិបតីលោក Mohamed Bazoum នៅក្នុងរដ្ឋប្រហារលើកទី៧ នៅអាហ្វ្រិកខាងលិចនិងភាគកណ្តាលក្នុងរយៈពេលបីឆ្នាំមកនេះ។ 

បេសកកម្មដែលបានស្នើឡើង បានលើកឡើងនូវទិដ្ឋភាពនៃជម្លោះកាន់តែជ្រៅនៅក្នុងតំបន់ដ៏សំខាន់ជាយុទ្ធសាស្ត្រ ដែលប្រទេសមហាអំណាចលោកខាងលិចបានបាត់បង់ឥទ្ធិពលក្នុងអំឡុងសន្ទុះខ្លាំងនៃរដ្ឋប្រហារ និងកន្លែងដែលឥទ្ធិពលរបស់រុស្ស៊ីហាក់ដូចជាកំពុងកើនឡើង។