ភ្នំពេញ៖ គិតត្រឹមខែសីហា ឆ្នាំ២០២៣ ប្រជាពលរដ្ឋដែលប្រកបរបរ និងមានចំណូលផ្ទាល់ខ្លួន ដូចជា៖អាជីករ ជាងកាត់ដេរ អ្នករត់ម៉ូតូ កង់បី ឬហៅថាបុគ្គលស្វ័យនិយោជន៍ ចំនួនប្រមាណជាង ២ម៉ឺន ១ពាន់នាក់ បានចុះឈ្មោះចូលជាសមាជិក ប.ស.ស. តាមរបបភាគទានដោយស្ម័គ្រចិត្ត ដោយពួកគាត់នឹងទទួលបានការគាំពារទៅលើការថែទាំសុខភាព រួមទាំងប្រាក់បំណាច់មាតុភាព។

ឯកឧត្តមបណ្ឌិត ហេង សុផាន់ណារិទ្ធ អគ្គនាយករង និងជាអ្នកនាំពាក្យនៃបេឡាជាតិសន្តិសុខសង្គម នៅរសៀលថ្ងៃទី១២ សីហា ឆ្នាំ២០២៣នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ឲ្យដឹងថា ដើម្បីមានសិទ្ធិទទួលប័ណ្ណសមាជិក ប.ស.ស. បុគ្គលស្វ័យនិយោជន៍ ត្រូវអនុវត្តតាមលក្ខខណ្ឌរួមមាន៖ ១)មានមុខរបរមានប្រាក់ចំណូលផ្ទាល់ខ្លួន មិនពាក់ព័ន្ធនិងប្រាក់ឈ្នួល, ២) ធ្វើការងារ ឬប្រកបរបរអាជីវកម្មផ្ទាល់ខ្លួន ដោយមិនប្រើប្រាស់បុគ្គលិក ៣) ត្រូវមានអាយុមិនលើសពី៦០ឆ្នាំ គិតត្រឹមកាលបរិច្ឆេទស្នើចុះបញ្ជីនៅ ប.ស.ស. និងទី៤) សាមីខ្លួនត្រូវអញ្ជើញមកស្នើសុំធ្វើប័ណ្ណ ប.ស.ស. ដោយផ្ទាល់ និងភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព)។

ឯកឧត្តម បានបញ្ជាក់បន្ថែមថា គិតរហូតមកដល់ពេលនេះ បេឡាជាតិសន្តិសុខសង្គមមានសមាជិកសរុបចំនួនជិត ២លាននាក់ ដែលក្នុងនោះសមាជិក ប.ស.ស. ក្នុងវិស័យឯកជនមានចំនួនជាង ១លាន ៤៩ម៉ឺននាក់, សមាជិក ប.ស.ស. ក្នុងវិស័យសាធារណៈ ចំនួនជាង ៤៣ម៉ឺននាក់ និងសមាជិក ប.ស.ស. ជាបុគ្គលស្វ័យនិយោជន៍សរុបចំនួនជាង ២ម៉ឺននាក់៕ ដោយ បូរ៉ាវី