ឯកឧត្តម នាយឧត្តមសេនីយ៍សាស្រ្តាចារ្យ ឯក មនោសែន អនុប្រធានបណ្ឌិត្យសភានគរបាលកម្ពុជា និងជាប្រធាននាយកដ្ឋានបណ្ដុះបណ្ដាលកាលពីរសៀលថ្ងៃទី១២ ខែសីហា ឆ្នាំ២០២៣ បានអញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលកម្រិតបឋមវិជ្ជាជីវៈនគរបាល ជំនាន់ទី១៧ លើកទី២ ជូនដល់សិស្សនាយនគរបាល និងសិស្សនាយនគរបាលរងក្របខណ្ឌថ្មីចំនួន ១៩៤ នាក់ ដោយសិក្សារយៈពេល៤ខែ។
នាយឧត្តមសេនីយ៍ ឯក មនោសែន បានថ្លែងថា វគ្គបណ្ដុះបណ្ដាលនេះ គឺជាប្រវត្តិសាស្រ្តដ៏សំខាន់ និងចាំបាច់បំផុតនៅក្នុងឆាកជីវិតរបស់សិស្សនគរបាលដោយបានផ្លាស់ប្ដូរការងាររបស់ប្អូនៗពីជនស៊ីវិល មកជាកងកម្លាំងនគរបាលជាតិ ហើយសិស្សដែលអាចទទួលបានវិញ្ញាបនបត្រសិក្សា លុះត្រាតែសិក្សាទទួលបានជោគជ័យ និងអនុវត្តន៍តាមនីតិវិធីជាធរមាន។
នាយឧត្តមសេនីយ៍បន្ថែមថា ក្រោមការយកចិត្តទុកដាក់ពីក្រសួងមហាផ្ទៃ ជាពិសេសក្រោមការដឹកនាំបញ្ជាផ្ទាល់ពីសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បណ្ឌិត្យសភានគរបាលកម្ពុជា បានដាក់ចេញនូវផែនការយុទ្ធសាស្រ្តរយៈពេល ៥ ឆ្នាំ និងកម្មវិធីកំណែទម្រង់លើការងារសំខាន់ៗជាបន្តបន្ទាប់។
នាយឧត្តមសេនីយ៍បានណែនាំដល់សិស្សនគរបាលគ្រប់រូបត្រូវយកចិត្តទុកដាក់សិក្សារៀនសូត្រ ហ្វឹកហាត់ ដោយធ្វើស្វ័យសិក្សាទាំងទ្រឹស្ដី និងការអនុវត្តជាក់ស្ដែង, មានវត្តមានគ្រប់ពេលសិក្សា និងពេលប្រជុំជួរ គោរពវិន័យឱ្យបានខ្ជាប់ខ្ជួន និងហាមដាច់ខាតចំពោះការប្រព្រឹត្តនូវសកម្មភាពខុសច្បាប់នានា, ត្រូវគោរពឱ្យបាននូវបទបញ្ជាផ្ទៃក្នុង បទប្បញ្ញត្តិ សេចក្ដីសម្រេចនានារបស់បណ្ឌិត្យសភា,ប្រកាន់ខ្ជាប់នូវទស្សនៈ រៀនឱ្យចេះ មិនមែនរៀនឱ្យចប់ គុណភាពមិនអាចសម្របសម្រួលបានឡើយ ,អ្នកដែលមិនទទួលជោគជ័យក្នុងការសិក្សានឹងមិនត្រូវបានផ្ដល់វិញ្ញាបនបត្រជូនទេ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
