កូដកម្មរថយន្តឈ្នួលខ្នាតតូច នៅរដ្ឋធានី Cape Town ប្រទេសអាហ្រ្វិកខាងត្បូង ត្រូវបានបញ្ចប់ បន្ទាប់ពីសមាគមរថយន្តស៊ីឈ្នួលក្នុងស្រុកបានចុះកិច្ចព្រមព្រៀងជាមួយក្រុមមន្ត្រីទីក្រុង។ អ្នក​បើក​រថយន្ត​ស៊ីឈ្នួលខ្នាតតូច បានចាប់ផ្តើមធ្វើបាតុកម្មនៅថ្ងៃទី៣ ខែសីហា ដើម្បីឆ្លើយ​តប​ទៅនឹ​ង​អ្វី​ដែល​ពួក​គេពណ៌នាថាជា "យុទ្ធសាស្ត្រប្រើដៃធ្ងន់" ប្រឆាំងនឹងពួកគេ ពីនគរបាល និងក្រុម​អាជ្ញាធរ​ក្រុង។

ហេតុការណ៍នោះបានបង្កឱ្យមានភាពចលាចលនៅក្នុងទីក្រុង Cape Town ដែលជាកំពង់ផែ និង​ទី​ក្រុង​ទេសចរណ៍ នៃប្រទេសអាហ្វ្រិកខាងត្បូង ដោយសាររថយន្តស៊ីឈ្នួលខ្នាតតូច គឺជា​មធ្យោបាយ​ដឹក​ជញ្ជូនដ៏សំខាន់សម្រាប់អ្នកដំណើររបស់ប្រទេសនេះ។

ស្ថានការណ៍កាន់តែតានតឹងឡើង រួមមានអំពើហិង្សា ការបិទផ្លូវ និងការបំផ្លិចបំផ្លាញ​យាន​យន្ត​សាធារណៈ និងឯកជន បង្កការរំខានដល់ការរស់នៅប្រចាំថ្ងៃរបស់ប្រជាពលរដ្ឋយ៉ាងច្រើន។

កូដកម្មហិង្សានេះក៏បានឆក់យកជីវិតមនុស្ស៥នាក់ ប៉ះពាល់ដល់អាជីវកម្មជាច្រើន និង​បណ្តាល​ឱ្យ​សិស្ស​ចំនួន៧០% ខកខានការសិក្សា។ មនុស្សជាច្រើនពុំមានមធ្យោបាយដឹកជញ្ជូនទៅធ្វើការ ហើយ​អ្នកខ្លះទៀតត្រូវបានបង្ខំឱ្យដើរទៅកន្លែងធ្វើការរបស់ពួកគេ។

ឥឡូវនេះ ទោះបីជាកូដកម្មបានបញ្ចប់ ហើយរថយន្ត​ស៊ីឈ្នួល​ខ្នាត​តូច​ត្រលប់​មក​ធ្វើ​ការ​តាម​ផ្លូវ​វិញ​ក៏​ដោយ អំពើហឹង្សាដែលទាក់ទងនឹងសកម្មភាពធ្វើកូដកម្មនេះនៅតែមានផលប៉ះពាល់ជាខ្លាំង។

សម្រាប់អ្នករស់នៅទីក្រុង Cape Town ជាច្រើន ការបញ្ចប់កូដកម្មរថយន្តស៊ីឈ្នួលខ្នាតតូចនេះ បាន​នាំ​មក​នូវអារម្មណ៍ធូរស្រាលយ៉ាងខ្លាំង ដែលសេវាដឹក​ជញ្ជូន​ទៅ​កាន់​កន្លែង​ធ្វើ​ការ​របស់​ពួក​គេ​បាន​ដំណើរការឡើងវិញ ហើយអំពើហិង្សាបានឈានដល់ទីបញ្ចប់៕