ប្រទេសស៊ូដង់បានដំឡើងតម្លៃប្រេងឥន្ធនៈជិត ១៧ភាគរយ ខណៈជម្លោះដែលអូសបន្លាយ នាំឱ្យមានភាពចលាចល កាត់ផ្ដាច់ខ្សែសង្វាក់ផ្គត់ផ្គង់ និងមានការរំខាននៅគ្រប់មជ្ឈដ្ឋាន ទន្ទឹមនឹងវិបត្តិសេដ្ឋកិច្ចក្នុងប្រទេស នេះបើយោងតាមក្រសួងថាមពល និងប្រេងស៊ូដង់។
ក្រសួងបានណែនាំដល់ស្ថានីយសេវាប្រេងឥន្ធនៈឱ្យដំឡើងថ្លៃសាំងដល់៦៣០ផោនស៊ូដង់ (១,០៥ ដុល្លារ) ក្នុងមួយលីត្រពីតម្លៃ៥៩០ផោនកាលពីមុន ហើយតម្លៃប្រេងលាយក្នុងមួយលីត្រឡើងដល់៥៩០ផោនពីតម្លៃ ៥៨២ ផោនពីមុន។
នេះជាការឡើងថ្លៃប្រេងជាលើកទីពីរក្នុងមួយឆ្នាំ។ លើកនេះ វាកើតឡើងស្របពេលមានជម្លោះរវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សយោធាប៉ារ៉ា ដែលបានចាប់ផ្តើមជាងបួនខែមុនមក។
កំណើនតម្លៃថ្មីនេះត្រូវបានគេរំពឹងថា នឹងបង្កឱ្យមានការកើនឡើង នៃតម្លៃការចំណាយក្នុងការរស់នៅប្រចាំថ្ងៃរបស់ប្រជាជន។
ទោះជាយ៉ាងណាក៏ដោយ រដ្ឋាភិបាលកំពុងពិនិត្យមើលការសម្រេច ក្នុងជំហានថយក្រោយពីកំណើនថ្មីនេះ ដោយពិចារណាលើផលលំបាកផ្នែកសេដ្ឋកិច្ចរបស់ខ្លួន ស្របពេលមានជម្លោះប្រដាប់អាវុធដែលបានប៉ះពាល់ដល់ប្រទេស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
