គ្រោះរាំងស្ងួតបានជំរុញឱ្យតម្លៃអង្ករលក់ដុំនៅប្រទេសថៃ កើនឡើងនៅឆ្នាំនេះ។ គិតត្រឹមថ្ងៃទី ៤ ខែសីហា អង្ករផ្កាម្លិះមានតម្លៃចាប់ពី ១៤.៥០០បាត ទៅ ១៦.០០០បាតក្នុងមួយតោន នេះបើយោងតាមក្រសួងពាណិជ្ជកម្ម។ អង្ករដំណើបមានតម្លៃចាប់ពី ១៣.៥០០បាត ទៅ ១៤.៧០០បាតក្នុងមួយតោន និងអង្ករក្រអូបឈ្មោះ Pathum Thani មានតម្លៃចាប់ពី ១២.០០០បាត ទៅ ១៣.០០០បាតក្នុងមួយតោន។

ទោះជាយ៉ាងណាក៏ដោយ នាយកដ្ឋានពាណិជ្ជកម្មផ្ទៃក្នុងបានរាយការណ៍ថា តម្លៃលក់រាយនៃអង្ករនៅតែមានស្ថេរភាព។ ក្នុងឆ្នាំនេះ អង្ករផ្កាម្លិះ មានតម្លៃជាមធ្យម ២១០បាត និងអង្ករស មានតម្លៃជាមធ្យម ១១៨បាតក្នុងមួយបាវ ធៀបនឹងតម្លៃ២០៩បាត និង១១៩បាតក្នុងមួយប៉េកាលពីឆ្នាំមុន ។

នាយកដ្ឋានស្រូវអង្ករ រំពឹងថាទិន្នផលស្រូវនៅឆ្នាំនេះនឹងមានចំនួន៣២,៣៥លានតោន ដោយធ្លាក់ចុះចំនួន៥,៦% ពីតួលេខ៣៤,៣លានតោនកាលពីឆ្នាំមុន ដោយសារគ្រោះរាំងស្ងួត។ ប្រធានសមាគមអ្នកនាំចេញអង្ករថៃលោក Charoen Laothammatas បាននិយាយថា ឆ្នាំនេះអាចជាឆ្នាំល្អសម្រាប់កសិករ ដោយសារតម្លៃស្រូវបានឡើងថ្លៃខ្លាំង។

លោកបានបន្តថា តម្លៃអង្ករសពិភពលោកបានឡើងថ្លៃបន្ទាប់ពីប្រទេសឥណ្ឌាបានហាមឃាត់ការនាំចេញអង្ករ ហើយគេនៅតែមិនច្បាស់ទេថា តើការហាមឃាត់ការនាំចេញអង្ករនោះ នឹងមានរយៈពេលយូរប៉ុណ្ណានោះទេ៕