អ្នករស់រានមានជីវិតពីហេតុការណ៍ចំហេះព្រៃ បានចែករំលែករឿងរ៉ាវដ៏ជូរចត់របស់ពួកគេ និងក្តីសង្ឃឹមរបស់ពួកគេ ចំពោះទីក្រុងប្រវត្តិសាស្ត្រ Lahaina អមជាមួយនឹងការឈឺចាប់របស់ពួកគេ បន្ទាប់ពីបានត្រឡប់ទៅផ្ទះសម្បែងដែលឆេះអស់គ្មានសល់អ្វីសោះ ក្រោយភ្លើងឆេះដ៏មហន្តរាយ បានឆក់យកជីវិតមនុស្សជិត ១០០នាក់ នៅទូទាំងកោះ Maui នៃរដ្ឋ Hawaii របស់សហរដ្ឋអាមេរិក។

អ្នកស្រុកភូមិ បាននិយាយថា គ្រួសាររបស់ពួកគេ បានបាត់បង់អ្វីគ្រប់យ៉ាង នៅក្នុងគ្រោះមហន្តរាយកាលពីថ្ងៃទី៨ ខែសីហា ដែលជាចំហេះព្រៃដ៏សាហាវបំផុតរបស់សហរដ្ឋអាមេរិក ក្នុងរយៈពេលជាង ១០០ឆ្នាំមកនេះ។ អ្នកស្រុកដើម នៅក្រុង Lahaina លោក Pila Taufa បាននិយាយថា៖ «ខ្ញុំចង់និយាយថា វានឹងចំណាយពេលជាច្រើនឆ្នាំ ដើម្បីកសាងឡើងវិញ និងដើម្បីឲ្យអ្វីៗត្រលប់មកដូចដើមវិញ»។

ទីក្រុង Lahaina មើលទៅដូចជាគំនរផេះ បន្ទាប់ពីត្រូវបានបំផ្លាញដោយចំហេះព្រៃ ដែលបានឆក់យកជីវិតមនុស្ស ៩៩នាក់ គិតត្រឹមរសៀលថ្ងៃចន្ទ (ទី១៤ ខែសីហា) ហើយលោក Taufa បានបាត់បង់ចំណែកនៃគ្រួសាររបស់គាត់។ លោក Taufa និយាយទាំងអួលដើមកថា៖ «ខ្ញុំមានមីងម្នាក់ និងពូម្នាក់ គ្រួសារដែលមានគ្នា ៤នាក់ កូនស្រី និងចៅប្រុសអាយុ ៧ឆ្នាំ ពួកគេទាំងអស់ត្រូវបានភ្លើងឆេះ នៅទីនោះ។ ពួកគេព្យាយាមរត់ចេញ ប៉ុន្តែពួកគេនៅក្នុងឡាន។ ខ្ញុំគិតថា ប្រហែលជាទូរស័ព្ទធ្លាក់ចូលក្នុងឡាន ហើយពួកគេជាប់នៅខាងក្នុងឡាន ហើយក៏ត្រូវភ្លើងឆេះស្លាប់តែម្ដង»។

យោងតាមអភិបាលរដ្ឋ Hawaii លោក Josh Green បានឲ្យដឹងថា សំណង់ចំនួនប្រហែល ២.២០០ខ្នង ត្រូវបានបំផ្លាញ ឬរងការខូចខាតដោយសារតែភ្លើងឆាបឆេះ នៅភាគខាងលិចកោះ Maui ដែលជាតាំងរបស់ក្រុង Lahaina ដោយសំណង់អាគារដែលខូចខាតនោះ ប្រហែល ៨៦ភាគរយ ជាលំនៅឋាន។

អ្នកស្រុកក្នុងតំបន់ម្នាក់ទៀត ឈ្មោះអ្នកនាង Jannifer Williams បាននិយាយថា៖ «វាជាផ្ទះរបស់យើង។ យើងបានរស់នៅទីនេះអស់រយៈពេល ៣០ឆ្នាំមកហើយ។ កូនៗ របស់យើងបានកើតនៅទីនេះ។ យើងមិនដឹងថា ជំហានបន្ទាប់ នឹងត្រូវចាប់ធ្វើអ្វីមុននោះឡើយ»។ 

អ្នកនាង Williams និងគ្រួសាររបស់នាង បានវិលត្រឡប់ទៅកាន់ទីក្រុងដែលរងគ្រោះយ៉ាងធ្ងន់ធ្ងរនេះវិញ បន្ទាប់ពីមានសំណាងរួចជីវិត ក្រោយរត់គេចពីអណ្តាតភ្លើង ដែលឆាបឆេះនៅក្នុងរថយន្តរបស់ពួកគេ តែយ៉ាងណាក្ដី ពួកគេបែរជាមកត្រូវស្វែងរកផ្ទះដែលឆេះខ្ទេចទៅជាផេះទៅវិញ។

ក្រុមមន្ត្រីបានរឹតបន្តឹងការចូលទៅកាន់ក្រុង Lahaina ខណៈពេលដែលក្រុមជួយសង្គ្រោះ នៅតែបន្តការងារស្វែងរកជនរងគ្រោះដោយអគ្គិភ័យនេះ។ មុនពេលពួកគេ ត្រូវបានអនុញ្ញាតឲ្យត្រឡប់ទៅកាន់ទីលំនៅវិញ លោក Taufa បាននិយាយថា ពួកគេបានបោះជំរុំនៅទីហាលវាល៕