ភ្នំពេញ៖ ដោយទទួលបានសម្លេងគាំទ្ររហូតដល់ ២៤/២៤ លោក ញ៉ឹល សំបូរ ត្រូវបានអនុញ្ញាតឲ្យបន្តដឹកនាំសមាគមប្រធានមន្ទីរពាណិជ្ជកម្ម ក្រសួងពាណិជ្ជកម្ម អាណិត្តិទី២ បន្តទៅមុខទៀត ដើម្បីដោះស្រាយបញ្ហាប្រឈម និងសំណូមពរនានាដែលកើតមានឡើងក្នុងកិច្ចការគ្រប់គ្រងជំនាញ និងស្ថាប័នក្នុងវិស័យពាណិជ្ជកម្ម។

 ក្រសួងពាណិជ្ជកម្ម នៅល្ងាចថ្ងៃទី១៦ សីហា ឆ្នាំ២០២៣នេះ បានសសេរក្នុងផេកផ្លូវការថា សមាគមប្រធានមន្ទីរក្រសួងពាណិជ្ជកម្ម បានប្រកាសជាផ្លូវការកាលពីខែតុលា ឆ្នាំ២០១៨ ដែលទទួលស្គាល់ជាផ្លូវការដោយ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានកិត្តិយសមាគម បន្ទាប់ពីមហាសន្និបាតអនុម័តលក្ខន្តិកៈរបស់សមាគម និងបោះឆ្នោតជ្រើសរើសប្រធានសមាគម។ បច្ចុប្បន្ន សមាគមមានសមាជិក សមាជិកាសរុបចំនួន ២៥រូប។ គិតរហូតមកដល់ពេលនេះ សមាជិកសមាគមបានចូលនិវត្តន៍ចំនួន ៩រូប ក្នុងនោះរួមមាន ខេត្តកណ្តាល, តាកែវ, កោះកុង, កំពង់ឆ្នាំង, កំពង់ធំ, ព្រះវិហារ, រតនគីរី, កំពង់ចាម និងរាជធានីភ្នំពេញ។ 

នៅសន្និបាតបូកសរុបលទ្ធផលការងារ និងលើកទិសដៅសម្រាប់អាណត្តទី២ នៅខេត្តកំពត លោក ញ៉ឹល សំបូរ

បានប្តេជ្ញាចិត្តថា នឹងខិតខំយកចិត្តទុកដាក់ដឹកនាំ និងបំពេញការងារក្នុងនាមប្រធានសមាគមស្របតាមលក្ខន្តិកៈរបស់សមាគម,បន្តខិតខំថែរក្សាសមិទ្ធផលដែលមានស្រាប់ និងបន្តកសាងសមត្ថភាពគ្រប់គ្រងស្ថាបនឱ្យបានល្អ ដើម្បីជាគំរូដល់ថ្នាក់ដឹកនាំជំនាន់ក្រោយៗទៀត។ល។

នាឱកាសនោះដែរ ឯកឧត្តម ប៉ាន សូរស័ក្តិ បានផ្តល់អនុសាសន៍ណែនាំ និងលើកទឹកចិត្តដល់សមាជិកនៃសមាគមទាំងអស់ ឲ្យបន្តសាមគ្គីភាពឯកភាពផ្ទៃក្នុង រវាងខេត្តនិងខេត្ត, ត្រូវផ្លាស់ប្តូរយោបល់ និងចែករំលែកបទពិសោធន៍នានាពាក់ព័ន្ធនិងការគ្រប់គ្រងវិស័យពាណិជ្ជកម្ម។ បន្ថែមពីនេះ ត្រូវង្កើតបានជាមូលនិធិសម្រាប់ជួយសម្រាលបន្ទុកគ្នាទៅវិញទៅមកក្នុងគ្រួសារសមាគមឲ្យល្អប្រសើរផងដែរ។ 

ក្រោមការដឹកនាំរបស់់ឯកឧត្តម ប៉ាន សូស័ក្តិ លោកតែងតែផ្តល់ធាតុចូលដល់ថ្នាក់ដឹកនាំក្រសួង និងមន្ត្រីរាជការមន្ទីរពាណិជ្ជកម្មរាជធានី ខេត្ត តាមរយៈកិច្ចប្រជុំផ្សេងៗ ក៏ដូចជាក្នុងកម្មវិធីសំណេះសំណាលនៅតាមមន្ទីរពាណិជ្ជកម្មរាជធានី ខេត្ត។ បន្ថែមលើនោះទៀត គឺបានជួយជ្រោមជ្រែងដល់មន្ទីរពាណិជ្ជកម្មរាជធានី ខេត្ត ដែលមានកន្លែងធ្វើការមិនសូវសមរម្យ ក្លាយជាមន្ទីរដែលមានលក្ខណៈសមរម្យល្អ និងមានផាសុខភាព៕ ដោយ ៖ បូរ៉ាវី