ក្រសួងពាណិជ្ជកម្មចិន កាលពីថ្ងៃពុធ (ទី១៦ ខែសីហា) បានឲ្យដឹងថា ខ្លួនបានចាប់អារម្មណ៍លើរបាយការណ៍របស់ក្រុមប្រឹក្សាអង្គការពាណិជ្ជកម្មពិភពលោក (WTO) ទាក់ទងនឹងវិធានការរបស់ចិនប្រឆាំងនឹងវិធានការពន្ធគយជំពូកទី២៣២ របស់សហរដ្ឋអាមេរិក ពាក់ព័ន្ធនឹងដែកថែប និងអាលុយមីញ៉ូម។

មន្ត្រីមួយរូប បាននិយាយថា ក្រសួងកំពុងសិក្សាពីរបាយការណ៍នេះ ហើយនឹងបន្តតាមដាន ដោយអនុលោមតាមច្បាប់របស់ WTO ដោយមន្ត្រីរូបនេះបានបន្ថែមថា មូលហេតុ ដែលជាឫសគល់នៃបញ្ហា ក្នុងករណីនេះ គឺការសម្រេចជាឯកតោភាគី និងគាំពារនិយមរបស់សហរដ្ឋអាមេរិក ហើយបញ្ជាក់ថា វិធានការតបតរបស់ចិន នឹងត្រូវបានធ្វើឡើងស្របតាមច្បាប់ និងសកម្មភាពស្របច្បាប់ ដើម្បីការពារសិទ្ធិ និងផលប្រយោជន៍ស្របច្បាប់របស់ប្រទេស។

មន្ត្រីដដែល បាននិយាយថា ចាប់តាំងពីខែមីនា ឆ្នាំ២០១៨ មក សហរដ្ឋអាមេរិកបានធ្វើឲ្យមានលក្ខណៈទូទៅនៃទស្សនៈពី «សន្តិសុខជាតិ» និងបានកំណត់ពន្ធលើផលិតផលដែកថែប និងអាលុយមីញ៉ូម ដែលនាំចេញទៅសហរដ្ឋអាមេរិកពីសំណាក់សមាជិករបស់ WTO ជាច្រើន ក្នុងនោះរួមទាំងប្រទេសចិនផងដែរ។

មន្ត្រីរូបនេះ បានសង្កត់ធ្ងន់ថា វិធានការនេះ បាននាំឲ្យមានការមិនពេញចិត្តយ៉ាងខ្លាំងក្លា ហើយប្រទេសចិន និងប្រទេសសមាជិក WTO ជាច្រើនទៀត បានប្រើយន្តការដោះស្រាយវិវាទរបស់ WTO ខណៈកាលពីខែធ្នូ ឆ្នាំ២០២២ WTO បានសម្រេចថា វិធានការរបស់សហរដ្ឋអាមេរិក បានរំលោភលើច្បាប់របស់ WTO។

ជាចុងក្រោយ មន្ត្រីរូបនេះ បាននិយាយថា៖ «ប្រទេសចិនទាមទារឲ្យសហរដ្ឋអាមេរិកលុបចោលជាបន្ទាន់នូវវិធានការជំពូកទី២៣២ ពាក់ព័ន្ធនឹងដែកថែប និងអាលុយមីញ៉ូម ដែលការធ្វើបែបនេះ បំពានច្បាប់របស់ WTO ហើយអំពាវនាវឲ្យធ្វើការជាមួយសមាជិក WTO ផ្សេងទៀត ក្នុងទិសដៅស្របគ្នា ដើម្បីរក្សាប្រព័ន្ធពាណិជ្ជកម្មពហុភាគី ដែលមានច្បាប់ជាមូលដ្ឋានជាមួយគ្នា»៕