អារ៉ាប់ ៖ ឆ្មាំព្រំដែនអារ៉ាប៊ីសាអូឌីត រងការចោទប្រកាន់ថាបានសម្លាប់រង្គាលលើជនអន្តោប្រវេសន៍នៅតាមតំបន់ព្រំដែនយេម៉ែន ក្នុងរបាយការណ៍ថ្មីមួយរបស់ក្រុមឃ្លាំមើលសិទ្ធិមនុស្ស ។ 

របាយការណ៍ថ្មីនេះ និយាយថា មនុស្សរាប់រយនាក់ ភាគច្រើនគឺជាជនជាតិអេត្យូពីដែលឆ្លងកាត់ប្រទេសយេម៉ែន ដើម្បីធ្វើដំណើរទៅកាន់ប្រទេសអារ៉ាប៊ីសាអូឌីត ត្រូវបានបាញ់សម្លាប់ ។ 

ជនអន្តោប្រវេសន៍និយាយប្រាប់ BBCថា ពួកគេរងរបួសអវៈយវៈធ្ងន់ធ្ងរដោយសារការបាញ់ប្រហារ ហើយពួកគេបានមើលឃើញសាកសពមនុស្សនៅតាមផ្លូវ ។ 

កាលពីមុន ប្រទេសអារ៉ាប៊ីសាអូឌីត ធ្លាប់ច្រានចោលការចោទប្រកាន់ពីការសម្លាប់ជាប្រព័ន្ធបែបនេះ ។ 

របាយការណ៍ “They Fired On Us Like Rain(ពួកគេបាញ់ស្រោចមកលើពួកយើងដូចគ្រាប់ភ្លៀង)”របស់ក្រុមឃ្លាំមើលសិទ្ធិមនុស្ស មានសក្ខីកម្មជាក្រាហ្វិកពីជនអន្តោប្រវេសន៍ ដែលនិយាយថា ពួកគេត្រូវបានគេបាញ់ប្រហារដោយក្រុមនគរបាល និងទាហានអារ៉ាប៊ីសាអូឌីត នៅតាមតំបន់ព្រំដែនភាគខាងជើងយេម៉ែន ជាប់នឹងអារ៉ាប៊ីសាអូឌីត ។ 

លោក Mustafa Soufia Mohammed វ័យ ២១ឆ្នាំ គឺជាជនអន្តោប្រវេសន៍មួយរូប និយាយថា ការបាញ់ប្រហារ កើតមានអត់ឈប់ឈរ ។  

លោកនិយាយថា មនុស្សមួយចំនួនក្នុងចំណោមក្រុមជនអន្តោប្រវេសន៍មានគ្នា ៤៥នាក់របស់លោក ត្រូវបានសម្លាប់ ពេលដែលពួកគេរងការបាញ់ប្រហារ អំឡុងពេលព្យាយាមឆ្លងកាត់ព្រំដែនកាលពីខែកក្កដា ឆ្នាំមុន ។ 

លោកបន្តថា លោកអត់ដឹងថាលោកត្រូវគ្រាប់កាំភ្លើងនោះទេ ប៉ុន្តែពេលដែលលោកព្យាយាមក្រោកឈរដើរ ស្រាប់តែជើងរបស់លោកកម្រើកលែងកើតតែម្តង ៕