បូលីវី៖ ចំហេះព្រៃដ៏កាចសាហាវ បាននិងកំពុងរីករាលដាលនៅក្នុងប្រទេសបូលីវី និងប្រទេសប៉េរូ ដែលប៉ះពាល់ដល់អ្នករស់នៅក្នុងប្រទេសទាំងពីរ ដោយមានអ្នកស្លាប់យ៉ាងហោចណាស់៥នាក់ ត្រូវបានរាយការណ៍នៅក្នុងប្រទេសប៉េរូ។ 

នៅតំបន់ Cochabamba និងតំបន់ La Paz ចំហេះបានដុតបំផ្លាញរុក្ខជាតិ និងសត្វព្រៃដែលជិតផុតពូជជាច្រើន។ ទោះបីជាយ៉ាងណាក៏ដោយ អនុរដ្ឋមន្ត្រីការពារជនស៊ីវិលប្រទេសបូលីវី លោក Juan Carlos Calvimontes (វ៉ាន់ កាឡូស ខាលវីម៉ូនតេ) បានរាយការណ៍ថា តំបន់បេនី (Beni) គឺជាតំបន់ដែលមានចំហេះព្រៃច្រើនជាងគេ។

យោងតាមលោក Calvimontes បានឲ្យដឹងថា កងកម្លាំងប្រដាប់អាវុធជាង៥០០នាក់ ត្រូវបានបញ្ជូនទៅកាន់តំបន់ដែលរងផលប៉ះពាល់ដោយចំហេះនេះផងដែរ។ 

ទន្ទឹមនឹងនេះដែរ ប្រទេសប៉េរូ ប្រឈមមុខនឹងការលំបាកស្រដៀងគ្នានេះ ខណៈដែលភ្លើងបានឆាបឆេះតំបន់ Apurimac ដែលមនុស្សប្រាំនាក់បានស្លាប់។ 

ប្រព័ន្ធផ្សព្វផ្សាយក្នុងស្រុកបានរាយការណ៍ថា ផ្ទៃដីយ៉ាងហោចណាស់២០០ហិចតាត្រូវបានបំផ្លាញដោយចំហេះព្រៃនេះផងដែរ៕