ប្រព័ន្ធផ្សព្វផ្សាយបានរាយការណ៍ថា តុលាការអូស្ត្រាលី នៅថ្ងៃព្រហស្បតិ៍ (ទី២៤ ខែសីហា) នេះ បានកាត់ទោសអតីតនាយករបស់សាលាជនជាតិជ្វីហ្វជ្រុលនិយមគ្រិស្តនិកាយអូថូដុកឲ្យជាប់ពន្ធនាគារ ១៥ឆ្នាំពីបទរំលោភផ្លូវភេទលើសិស្ស ២នាក់។

លោកស្រី Malka Leifer កាលពីមេសា ត្រូវបានគេរកឃើញថា មានទោសលើបទល្មើសផ្លូវភេទចំនួន ១៨ករណី ក្នុងនោះរួមទាំងការរំលោភសេពសន្ថវៈ ការរំលោភបំពានរាងកាយ និងការលូកលាន់យ៉ាងអនាចារលើកុមារអាយុ ១៦ ឬ ១៧ឆ្នាំ។ គណៈវិនិច្ឆ័យ បានប្រកាសពីភាពគ្មានទោសរបស់លោកស្រី ជុំវិញបទចោទចំនួន ៩ករណីផ្សេងទៀត។

លោកស្រី Leifer វ័យ ៥៦ឆ្នាំ អតីតនាយកសាលា Adass Israel បានផ្ដល់ចម្លើយពីភាពគ្មានទោសកំហុសនូវរាល់ការចោទប្រកាន់ទាំងអស់។ លោកស្រី Leifer ដែលមានសញ្ជាតិអ៊ីស្រាអែលផងដែរនោះ ត្រូវបានធ្វើបត្យាប័នទៅអូស្ត្រាលីពីអ៊ីស្រាអែល ក្នុងឆ្នាំ២០២១ បន្ទាប់ពីបានភៀសខ្លួន នៅឆ្នាំ២០០៨ នៅពេលដែលការចោទប្រកាន់ ត្រូវបានធ្វើឡើង។

យោងតាមការរាយការណ៍របស់សារព័តមាន Australian Broadcasting Corp បានឲ្យដឹងថា ចៅក្រម នៅតុលាការតំបន់ Victoria លោក Mark Gamble បានកំណត់រយៈពេលមិនមានលក្ខខណ្ឌដោះលែង ១១ឆ្នាំ និង ៦ខែ ប៉ុន្តែបាននិយាយថា លោកនឹងរាប់បញ្ចូលរយៈពេល ២.០៦៩ថ្ងៃដែលអ្នកទោស បានជាប់ពន្ធនាគាររួចហើយ។

សូមបញ្ជាក់ថា បងប្អូនស្រី ៣នាក់ បានចោទប្រកាន់លោកស្រី Leifer ពីបទរំលោភបំពានផ្លូវភេទចំបោះពួកគេ លើដីនៅសាលារៀន ក្នុងទីក្រុង Melbourne នៅក្នុងការិយាល័យបុគ្គលិកដែលចាក់សោ នៅជំរំសាលារៀន និងនៅផ្ទះរបស់លោកស្រី Leifer តែម្ដង ក្នុងចន្លោះឆ្នាំ២០០៣ និងឆ្នាំ២០០៧ តាំងពីពួកគេនៅក្មេង។ តុលាការបានរកឃើញថា លោកស្រី Leifer មានទោសនៃការប្រព្រឹត្តបទល្មើសលើដើមចោទ ២នាក់៕